Irannyń álem chempıonatyna qatysýy oıyndardyń AQSh-tan basqa elge aýystyrylýyna baılanysty

Irannyń sport jáne jastar saıasaty mınıstri Ahmad Donııamalı Anadolu agenttigine bergen suhbatynda eger Halyqaralyq fýtbol federatsııasy (FIFA) matchtardy AQSh-tan Meksıkaǵa kóshirmese, el quramasynyń álem chempıonatyna qatysýy kúmán týdyrýy múmkin ekenin málimdedi.

Onyń aıtýynsha, Iran fýtbol federatsııasy FIFA-ǵa oıyndardy ótkizý ornyn ózgertý týraly ótinish joldaǵan, alaıda ázirge jaýap almaǵan.

— Bizdiń Iran quramasynyń matchtaryn AQSh-tan Meksıkaǵa kóshirý týraly ótinishimiz áli de ózekti, biraq jaýap joq. Eger bul ótinish qanaǵattandyrylsa, chempıonatqa qatysýymyzǵa kepildik beriledi. Alaıda FIFA ázirge jaýap bergen joq, — dedi Donııamalı.

Mınıstrdiń sózinshe, ırandyq fýtbolshylar daıyndyqtaryn jalǵastyryp jatyr jáne komanda týrnırge daıyn bolady. Qajetti qaýipsizdik kepildikteri berilgen jaǵdaıda, sońǵy sheshimdi Iran úkimeti qabyldaıdy.

Buǵan deıin FIFA týrnır matchtary bekitilgen kestege sáıkes ótetinin aıtyp, oıyndardy kóshirý múmkindigin joqqa shyǵarǵan edi. Uıym prezıdenti Djannı Infantıno Iran quramasy 2026 jylǵy álem chempıonatyna qatysyp, jerebege sáıkes matchtaryn AQSh-ta ótkizetinin málimdedi.

Al ırandyq mınıstr FIFA erejelerine sáıkes árbir elde qaýipsizdik tolyq qamtamasyz etilýi tıis ekenin atap ótti.

— FIFA shetelde ótetin álem chempıonatyna qatysatyn kez kelgen ulttyq quramaǵa qaýipsizdik kepildigin berýi kerek. Áıtpese, AQSh-ta oıyn ótkizýge ruqsat bermeýi tıis, — dedi Donııamalı.

Óz kezeginde Meksıka prezıdenti Klaýdııa Sheınbaým Iran quramasynyń matchtaryn óz elinde ótkizýge daıyn ekenin bildirdi.

2026 jylǵy fýtboldan álem chempıonaty AQSh, Kanada jáne Meksıkada ótedi. Iran quramasy Azııadan alǵashqylardyń biri bolyp týrnırge joldama alǵan. Komanda toptyq kezeńdegi úsh oıynyn AQSh-tyń batys jaǵalaýynda — Los-Andjeleste Jańa Zelandııa jáne Belgııamen, sondaı-aq Sıetlde Mysyr quramasyna qarsy oıyn ótkizýdi josparlaǵan. Alaıda AQSh pen Izraıldiń Iranǵa jasaǵan soqqylarynan keıin komandanyń týrnırge qatysýy kúmán týdyrdy.

Eki aptadan keıin AQSh prezıdenti Donald Tramp Iran quramasynyń elge kelýine múmkindik bar ekenin aıtqanymen, qaýipsizdik máselesine baılanysty olardyń qatysýyn orynsyz dep sanaıtynyn jetkizdi.

— Men olardyń óz qaýipsizdigi úshin bul jerde bolǵanyn durys dep sanamaımyn, — dedi Tramp.

Iran tarapy óz kezeginde quramany chempıonattan shettetýge bolmaıtynyn málimdedi. Iran fýtbol federatsııasynyń basshysy Mehdı Tadj qaýipsizdik kepildigi berilmeıinshe, komanda AQSh-qa barmaıtynyn aıtty.

Álem chempıonaty 11 maýsymda Meksıkada bastalyp, matchtar AQSh pen Kanadada da ótedi. Fınal 19 shildede Nıý-Djersıde bolady dep josparlanǵan.

Aıta keteıik, Iran aýmaǵyna áýeden jasalǵan soqqylar Tegeranǵa jaqyn Eslamshahr qalasyndaǵy turǵyn úıdi qıratyp, keminde 19 adamnyń ómirin qıdy.