Irannan Túrikmenstan arqyly 13 ózbekstandyq Otanyna oraldy
TAShKENT. KAZINFORM — Ózbekstannyń Syrtqy ister mınıstrligi Irannan Túrikmenstan aýmaǵy arqyly Otanyna oralyp jatqan azamattarǵa shuǵyl kómek kórsetip jatyr, dep habarlaıdy Kazinform agenttiginiń Tashkenttegi menshikti tilshisi.
Dunyo aqparat agenttiginiń málimetinshe, Ózbekstannyń Ashhabadtaǵy elshiligi, Túrkimenstannyń Syrtqy ister mınıstrligi jáne basqa da quzyretti vedomstvolarmen birlesip, ózbekstandyqtardy elge qaıtarý jumysy júrip jatyr.
Osynyń nátıjesinde dıplomattar Túrikmenstan men Iran shekarasynda ornalasqan Serahs qalasynda 13 otandasyn qarsy alyp, olardy Ózbekstanǵa jetkizdi.
Agenttikten atap ótkendeı, 2 naýryzdan bastap «Gaýdan — Badjgıran», «Artık — Lýtfabad», «Akaıaıla — Inchebýrýn» jáne «Oltın Asır — Inchebýrýn» kedendik ótkizý beketteri qaıta ashyldy. Bul pýnktiler Túrikmenstan men Iran shekarasynda ornalasqan.
Eske salsaq, buǵan deıin Ózbekstannyń Syrtqy ister mınıstrligi qajylyq, demalys jáne basqa da maqsatta Taıaý Shyǵys elderine barýǵa nıetti azamattarǵa saparlaryn keıinge shegerýdi usyndy.
Sonymen, 28 aqpanda Izraıl Iranǵa soqqy jasady. Sol kúni Iran Izraılge qarymta jaýap retinde birneshe zymyran jiberdi.
Keshe Irannyń IRNA memlekettik aqparat agenttigi eldiń Joǵarǵy kóshbasshysy aıatolla Álı Hameneı qaza tapqanyn habarlady. Buǵan qosa, Álı Hameneıdiń keńesshisi — Iran Qorǵanys keńesiniń hatshysy Álı Shamhanı men Islam revolıýtsııasy saqshylary korpýsynyń qolbasshysy Mohammad Pakpýr kóz jumdy.
Keıin Aıatolla Arafı Irannyń ýaqytsha Joǵary jetekshisi bolyp taǵaıyndaldy.
Búgin AQSh prezıdenti Donald Tramp Iranǵa qarsy áskerı operatsııa qoıylǵan mindetter tolyq oryndalǵanǵa deıin jalǵasatynyn habarlady.