Irannan shyǵarylǵan 70-ten astam aýǵanstandyq bosqyn jol apatynan qaza tapty

ASTANA. KAZINFORM — Kabýlǵa bet alǵan bosqyndardy mingen avtobýs mototsıklmen soqtyǵysyp, keıin janarmaı tıegen júk kóligine soǵylǵan, dep habarlaıdy DW.  

Aýǵanstannyń batysyndaǵy Gerat provıntsııasynda seısenbi, 19 tamyzda avtobýs, mototsıkl jáne júk kóliginiń soqtyǵysýy saldarynan kem degende 71 adam, onyń ishinde 17 bala qaza tapty. Zardap shekkenderdiń kópshiligi avtobýstaǵy jolaýshylar, dep habarlaıdy Al Jazeera jergilikti bılikke silteme jasap. AFP agenttiginiń habarlaýynsha, avtobýs Kabýlǵa baǵyt alǵan jáne Irannan deportatsııalanǵan aýǵandyq bosqyndardy tasymaldaǵan.

Polıtsııanyń málimdemesine sáıkes, avtobýs aldymen mototsıklmen soqtyǵysqan, sodan keıin janarmaı tasıtyn kólikke soǵylyp, janyp ketken. Oqıǵaǵa avtobýs júrgizýshisiniń jyldamdyqty asyryp, ereje buzýy sebep bolǵan.

Birikken Ulttar Uıymynyń (BUU) málimeti boıynsha, tek 2025 jyldyń birinshi jartysynda ǵana Iran men Pákistannan ondaǵan jyl boıy soǵys pen gýmanıtarlyq daǵdarystan qashqan 1,2 mıllıonnan astam aýǵandyq otanyna oraldy nemese oralýǵa májbúr boldy. Naýryzda Iran úkimeti elde zańdy mártebesi joq aýǵandyqtarǵa 6 shildege deıin óz erkimen ketýge ýaqyt berdi.

Eske sala keteıik, Aýǵanstanda áıelderge tálipterdiń bılikti basyp alý mereıtoıyn toılaýǵa tyıym salyndy.