Irannan kórshiles elder arqyly Qazaqstan azamattaryn evakýatsııalaýdyń baǵyttary anyqtaldy
ASTANA. KAZINFORM – Taıaý Shyǵystyń birqatar elderindegi áskerı-saıası ahýaldyń ýshyǵýy jaǵdaıynda Qazaqstan Respýblıkasynyń Syrtqy ister mınıstrligi kúsheıtilgen rejimde jumysyn jalǵastyryp jatyr.
— Óńirdegi shet elderdegi mekemelerdiń dıplomattary jaǵdaıdyń damýyn úzdiksiz baqylap, jedel áreket etý jáne konsýldyq-quqyqtyq kómek kórsetý maqsatynda jergilikti bılik organdary jáne el azamattarymen turaqty baılanysta bolyp, áýejaılarǵa júıeli túrde barýda.
Tótenshe baılanys jelileri men messendjerlerdegi jedel chattar arqyly azamattarmen táýlik boıy baılanysta bolý arqyly dıplomatııalyq ókildikter qyzmetkerleri óńirde jáne tranzıttik aımaqtarda ornalasqan qazaqstandyqtardyń tizimderin turaqty túrde jańartyp otyr, — delingen SІM habarlamasynda.
Qazirgi ýaqytta Qazaqstan Respýblıkasy azamattarynyń arasynda zardap shekkender týraly aqparat túsken joq.
Sońǵy derekterge sáıkes, shıelenis aımaqtarynda Qazaqstan azamattarynyń eń kóp sany tanymal týrıstik baǵyttar, qajylyq saparlary oryndary, sondaı-aq tranzıttik habtar shoǵyrlanǵan jerlerde. Onyń ishinde BAÁ-de shamamen 3 500 adam, SAK — shamamen 3 000 adam jáne Qatarda 1 500-ge jýyq adam.
Óńirdiń basqa memleketterge kelsek, dıplomatııalyq ókildikterdiń aqparatyna sáıkes Iranda 82 Qazaqstan azamaty, Bahreınde — 168 azamat, Kýveıt pen Iordanııada — árqaısysynda 134 azamattan, Izraılde shamamen 100 azamat tirkelgen.
Áskerı is-qımyldar bastalǵannan beri óńir elderiniń basym bóliginde áýe keńistigi jabylǵan.
Áýe tasymaldaýshylary reısterdi toqtatýǵa májbúr bolǵandyqtan, Qazaqstannyń shet elderdegi mekemeleri týrıstik kompanııalarmen birlesip azamattardy qonaqúılerge ýaqytsha ornalastyrý jumystaryn júrgizip jatyr.
Atap aıtqanda, BAÁ qonaqúılerinde bizdiń azamattarǵa jaǵdaı turaqtalǵanǵa deıin turý jáne tamaqtaný qamtamasyz etilgen.
— Buǵan deıin habarlanǵandaı, shıelenis aımaqtarynan qazaqstandyqtardy yqtımal evakýatsııalaý baǵyttary men sharalary pysyqtalyp jatyr. Qaýipsizdik maqsatynda jergilikti bılik organdary óz betinshe shyqpaýǵa keńes beredi. Evakýatsııalyq reıs uıymdastyrylǵan jaǵdaıda birinshi kezekte qoldaý sharalary halyqtyń neǵurlym osal sanattaryna, atap aıtqanda qart adamdarǵa, áıelder men balalarǵa kórsetiletin bolady, — delingen habarlamada.
Buǵan deıin Tegeran qalasynan «Zarkýh» kompanııasynyń ókilderin, Ekonomıkalyq yntymaqtastyq uıymynyń qyzmetkerlerin jáne dıplomatııalyq ókildik qyzmetkerlerin qosa alǵanda, Qazaqstannyń 50 azamaty shyǵaryldy.
Atqarylǵan jumys qorytyndysy boıynsha Qazaqstannyń shet elderdegi mekemeleri shet memleketterdiń quzyretti organdarymen Irannan kórshi elder arqyly azamattarymyzdy evakýatsııalaýǵa járdem kórsetý jóninde ýaǵdalastyqtarǵa qol jetkizdi.
Armıan tarapymen Qazaqstan azamattarynyń Armenııa aýmaǵy arqyly evakýatsııalanýy jaǵdaıynda Iran-Armenııa shekarasynan kedergisiz ótý máselesi kelisildi. Armenııanyń syrtqy saıası vedomstvosynyń basshylyǵymen turaqty baılanys saqtalýda.
Osyǵan uqsas jumys Ázerbaıjan tarapymen de júrgizildi, olar evakýatsııa máseleleri boıynsha qoldaý kórsetýge daıyn ekendigin bildirdi. Eldiń qurlyqtaǵy shekara ótkelderindegi ótkizý tártibi shekteýli bolǵandyqtan, shekaradan ótý úshin arnaıy ruqsat qajet.
Eki azamattyń ótinishi negizinde QR-dyń Ázerbaıjandaǵy elshiligi Irannan «Djýlfa» baqylaý-ótkizý pýnkti (Nahchyvan) arqyly kirýge jedel túrde ruqsat aldy.
Túrikmenstan tarapy da qazaqstandyq azamattardyń evakýatsııasy úshin memlekettik shekaradan ótýge járdem kórsetýge daıyn ekenin rastady.
Atalǵan baǵyttaǵy jumys úzdiksiz jalǵasýda, qosymsha túsindirmeler QR Syrtqy ister mınıstrliginiń jáne shet elderdegi mekemelerdiń resmı aqparattyq resýrstary arqyly jarııalanyp otyrady.
— Jedel aqparattandyrýdy qamtamasyz etý maqsatynda Syrtqy ister mınıstrligi zamanaýı tsıfrlyq quraldardy, sonyń ishinde Kaspi ınfraqurylymyn paıdalandy. Kompanııamen birlesip habarlamalar júıesi jolǵa qoıylyp, óńirdegi azamattardyń mobıldi qurylǵylaryna resmı aqparat pen túsindirmelerdiń der kezinde jetkizilýi qamtamasyz etildi.
Óńirdegi jaǵdaı tolyq turaqtanǵanǵa deıin azamattardy sabyr saqtaýǵa, jergilikti bılik organdarynyń talaptary men usynymdaryn oryndaýǵa, táýekeli joǵary aımaqtardan aýlaq bolýǵa, sondaı-aq ýaqytsha shekteýlerge túsinistikpen qaraýǵa shaqyramyz.
Qosymsha aqparat kelip túsýine qaraı habarlanatyn bolady. Osyǵan baılanysty QR Syrtqy ister mınıstrliginiń jáne shet elderdegi mekemelerdiń resmı habarlamalaryn muqııat qadaǵalap otyrýdy suraımyz, — delingen SІM habarlamasynda.
Aıta ketelik Air Astana qazaqstandyqtardy qaıtarý úshin Medına men Djeddaǵa reıs oryndaýy múmkin ekenin jazǵan edik.