Irannan ákelingen 27 qoljazba 18 ǵasyrdaǵy qazaq tarıhy men mádenıetine arnalǵan — Prezıdent
ASTANA. KAZINFORM — Iran delegatsııasy ákelgen 27 qoljazba 18 ǵasyrdaǵy qazaq tarıhy men mádenıetine arnalǵan. Bul týraly Aqordada Iran Islam Respýblıkasynyń Prezıdenti Masýd Pezeshkıanmen kelissózder qorytyndysyna oraı BAQ ókilderine arnalǵan birlesken málimdeme barysynda Memleket basshysy Qasym-Jomart Toqaev aıtty.
— Qazaq tilinde parsy sózderi kóp. Ǵalymdar tildik qorymyzdaǵy parsy sózderiniń úlesi 4 paıyz dep sanaıdy eken. Olardyń arasynda astana, paıda, kórme, dáýlet, dári, dármek, aýla, oraza jáne taǵy basqa sózder bar. Búginde Irannyń soltústigindegi Gúlstan provıntsııasynyń Gorgan, Bándar, Túrimen jáne Kúmbet qalalarynda 5 myńnan astam qazaq turady. Fırdoýsıdiń «Shahnamasy» men onyń keıipkerleri Turan halyqtaryna da jaqyn. Qazaqtyń uly aqyny Abaı Fırdoýsı, Hafez, Saǵdı sııaqty parsy shaıyrlarynyń shyǵarmalarymen tanys bolǵan, — dedi Prezıdent.
Memleket basshysy Iran delegatsııasy ákelgen kóne qoljazbalardyń kóshirmeleri 18 ǵasyrdaǵy qazaq tarıhy men mádenıetine arnalǵanyn aıtty.
— Usynylǵan 27 qoljazbada Qazaq handyǵynyń áleýmettik-ekonomıkalyq ahýaly, kórshi eldermen qarym-qatynasy, aımaqtaǵy básekelestik, Túrkistannyń saıası-ekonomıkalyq jaǵdaıy, Reseı patshalyǵynyń qazaq aımaqtary men handyqtaryna qatysty áreketteri týraly saraptamalar bar. Sondaı-aq qazaq dalasynda kómir, temir, mys, qorǵasyn, bırıýza kenishteriniń tabylyp, olardy óndirý máselesi sıpattalǵan. Óte qyzyq derekter bar. Sizge kóp raqmet, Prezıdent myrza, — dedi Qasym-Jomart Toqaev Iran Prezıdentine qarata.
Buǵan deıin Iran Qazaqstan tarıhyna qatysty qundy qoljazbalar kóshirmesin ala kelgenin jazǵan edik.