Iranmen mámile jeksenbide bekitiledi — Tramp
ASTANA. KAZINFORM — AQSh prezıdenti Donald Tramp Vashıngton men Tegeran arasyndaǵy soǵys qımyldaryn toqtatý jónindegi kelisimge qol qoıý jeksenbi kúni josparlanǵanyn málimdedi. Bul týraly BBC jazdy.
Tramptyń jazýynsha, qujatqa qol qoıylǵannan keıin Ormýz buǵazy barlyq tarap úshin ashylady.
— Kelisimge qol qoıý erteńge josparlanǵan. Qol qoıylǵan sátten keıin Ormýz buǵazy barlyǵyna ashylady, — dep ol Truth Social jelisinde jazdy.
Ol sondaı-aq kelisimnen keıin Irannyń joǵary baıytylǵan ýranyn joıý josparlanyp otyrǵanyn aıtty.
Tramptyń sózinshe, jaǵdaı turaqtalǵan kezde taraptar Iran aýmaǵynda nemese AQSh-ta «ıadrolyq materıaldy joıý» operatsııasyn júrgizýi múmkin. Ol AQSh pen Iran jáne jalpy Taıaý Shyǵys elderimen uzaq merzimdi yntymaqtastyq ornaýyna úmit bildirdi jáne Iranǵa qarsy kúsh qoldaný qajet bolmaıdy dep senetinin jetkizdi.
Buǵan deıin Iran Syrtqy ister mınıstri Abbas Arakchı AQSh-pen áskerı qaqtyǵysty toqtatý jónindegi kelisim aıaqtalýǵa jaqyn ekenin jáne Ormýz buǵazynyń ashylýyn qamtıtynyn aıtqan. Sondaı-aq ol Irannyń ıadrolyq baǵdarlamasyna qatysty kelissózder keıinirek bastalatynyn habarlaǵan.
Buǵan deıin AQSh pen Iran arasyndaǵy kelisim bir táýlik ishinde rásimdelýi múmkin ekeni habarlandy.
