Iranǵa jasalǵan shabýyl Taıaý Shyǵystaǵy áýe qatynasyn toqtatty
ASTANA. KAZINFORM — AQSh pen Izraıldiń Iranǵa jasaǵan shabýyldary Taıaý Shyǵys elderindegi jáne odan tys aımaqtardaǵy áýe qatynasyn buzdy, sebebi óńir elderi ózderiniń áýe keńistigin jaýyp, Eýropa, Afrıka jáne Batysty Azııamen qosatyn úsh negizgi áýejaı jumysy ýaqytsha toqtady, dep habarlaıdy Kazinform.
Izraıl, Qatar, Sırııa, Iran, Irak, Kýveıt jáne Bahreın óz áýe keńistigin jaýyp, júzdegen myń jolaýshynyń reısteri toqtap nemese basqa áýejaılarǵa baǵyttalýǵa májbúr boldy.
Shabýyl saldarynan Dýbaı, Abý-Dabı jáne Doha áýejaılary jabyldy, sondaı-aq iri Taıaý Shyǵys avıakompanııalary 1000-nan astam reısti toqtatty. Osy áýejaılarda jumys isteıtin úsh iri avıakompanııa — Emirates, Qatar Airways jáne Etihad kún saıyn shamamen 90 000 jolaýshyǵa qyzmet kórsetedi. Cirium analıtıkalyq kompanııanyń málimetinshe kóptegen saıahatshy Taıaý Shyǵysqa baǵyt alǵan. Dýbaı halyqaralyq áýejaıy halyqaralyq reıster sany boıynsha álemdegi eń kóp jumys isteıtin áýejaı
Saıahatshylardy jaǵdaıdyń jaqsaryp ketetinin aıtyp, aldaýsyratýdyń qajeti joq. Olar aldaǵy birneshe kúnde reısterdiń keshigýine nemese toqtap qalýyna daıyn bolaýy kerek, óıtkeni bul shabýyldar kúsheıip ketýi múmkin, biraq aıaqtalady dep úmittenemiz, - dedi Genrı Harteveldt, avıatsııa salasynyń taldaýshysy jáne atmosphere Research Group prezıdenti
Cirium kompanııasynyń derekterine sáıkes, Taıaý Shyǵys elderinde senbi kúni josparlanǵan 4218 reısten 966 reıs (22,9%) toqtatylǵan, al shyǵatyn reısterdi qosqanda bul kórsetkish 1800-den asady. Al jeksenbi kúni 4329 josparlanǵan reısten 716 reıs toqtatylǵan.
FlightAware saıtynyń málimetinshe, senbi kúni Grınvıch ýaqyty boıynsha 22:30–da álem boıynsha 18 000-nan astam reıs keshiktirilgen, al 2350-den astam reıs tolyq toqtatylǵan.
Taıaý Shyǵys arqyly ushatyn avıakompanııalar reısterin qaqtyǵys aımaǵynan aınaldyryp baǵyttaýǵa májbúr bolady. Bul ushý ýaqytyn uzartyp, otyn shyǵynyn arttyrady, ıaǵnı avıakompanııalarǵa qosymsha shyǵyn ákeledi. Sondyqtan eger qaqtyǵys uzaqqa sozylsa, bılet baǵasy tez ósýi múmkin, dep jazady The Guardian.
Reısterdiń kóbeıýi áýe dıspetcherlerine qosymsha júk salatyndyqtan, ushaqtardyń qaýipsiz qyzmet kórsetýin qamtamasyz etý úshin ushý jyldamdyǵyn tómendetýge týra keledi.
Buǵan deıin biz Dýbaı halyqaralyq áýejaılarynyń jumysyn toqtatqanyn habarlaǵan edik.
