Iranǵa ýran jetkizý týraly kelisimge Qazaqstannyń qatysy bar degen aqparatta esh negiz joq - Energetıka jáne mıneraldyq resýrstar vıtse-mınıstri
ASTANA. Qańtardyń 12-si. QazAqparat /Qanat Mámetqazyuly/ - Iranǵa ýran jetkizý týraly kelisimge Qazaqstannyń qatysy bar degen aqparatta esh negiz joq. Búgin QR Parlamenti Májilisi Halyqaralyq ister, qorǵanys jáne qaýipsizdik komıtetiniń keńeıtilgen otyrysy barysynda depýtattar saýalyna jaýap bergen QR Energetıka jáne mıneraldyq resýrstar vıtse-mınıstri Áset Maǵaýov osylaı málim etti,
dep habarlaıdy QazAqparat.
«Jeltoqsan aıynyń sońyna taman Qazaqstannyń Iranǵa ýran jetkizetindigi týraly qaýeset birqatar aqparat agenttikterinde oryn alǵan. Onda «Qazaqstan 1000-1300 tonnaǵa jýyq ýrandy Iranǵa 450 mln. dollarǵa satady» degenge saıatyn jalǵan aqparattar jarııalanǵan. Osy máseleni QR Energetıka jáne mıneraldyq resýrstar mınıstrligi Syrtqy ister mınıstrligimen, Indýstrııa jáne saýda mınıstrligimen birlesip talqylap, arnaıy jınalys ótkizdi. Jalpy aqparat agenttikterinde jarııalanǵan bul habar negizsiz qaýeset bolyp tabylady. Birinshiden, Qazaqstannyń ýranǵa qatysty eksporttyq baqylaýy qatań deńgeıde jumys isteıdi. Elimizden bundaı hımııalyq, radıaktıvtik zattardy syrtqa shyǵaratyn mekemeler tolyq baqylaýda bolyp, olardan eksporty úshin arnaıy lıtsenzııasy da talap etiledi. Al bundaı lıtsenzııany alý úshin de aldymen taýar jiberiletin eldiń naqtylaý sertıfıkaty bolýy shart. Ekinshiden, jalǵan aqparatta kórsetilgen 1000-1300 tonna ýran degenińizdiń ózi Qazaqstannyń jyldyq ýran óniminiń 10 paıyzyn quraıdy. Al Qazaqstannyń bundaı kólemde ýrandy Iranǵa satýy da múmkin emes. Bir sózben aıtqanda, BAQ-ta jarııalanǵan bundaı aqparat eshqandaı da negizsiz ári el abyroıyna kir keltiretin qaýeset qana», dedi Á. Maǵaýov.
Esterińizge sala keteıik, byltyrǵy jeltoqsan aıynyń sońyna taman birqatar BAQ-ta Iran Islam Respýblıkasyna ýran jetkizý týraly áldebir kelisimge Qazaqstannyń qatysy bar degen aqparat jarııalanǵan bolatyn. Osyǵan oraı, QR Syrtqy ister mınıstrligi bul aqparatty úzildi-kesildi joqqa shyǵaryp, buny qaýeset dep málimdegen edi.
