Iranǵa tıesili emes alǵashqy tanker Ormýz buǵazy arqyly ótti

ASTANA. KAZINFORM – Pákistan týy bar tanker AIS júıesi qosylǵan buǵazdan ótti, dep habarlaıdy Anadolu Ajansı.

Anadolu Ajansı agenttiginiń habarlaýynsha, AQSh pen Izraıldiń Iranǵa birlesken shabýyldarynan keıin Iran Ormýz buǵazyn jaýyp, ásirese osy eldermen baılanysty kemelerge ótýge tyıym salǵan. Sodan keıin buǵazdaǵy kólik qozǵalysy is júzinde toqtap qalǵan edi. 28 aqpannan bastap Ormýz buǵazy arqyly ótetin kemelerdiń kópshiligi Iran týy bar kemeler bolatyn.

MarineTraffic naqty ýaqyt rejımindegi baqylaý platformasynyń derekterine sáıkes, Taıaý Shyǵystaǵy shıelenistiń úshinshi aptasynda Abý-Dabıden Das shıki munaıyn tasymaldaıtyn Aframax «Karachi» tankeri avtomatty sáıkestendirý júıesi (AIS) iske qosylǵan, Ormýz buǵazy arqyly ótken alǵashqy ırandyq emes keme boldy.

— Uzyndyǵy 237 metr bolatyn munaı tsısternasy 15 naýryzda Túrkııa ýaqyty boıynsha saǵat 14:33-te Irannyń erekshe ekonomıkalyq aımaǵyna kirip, Ormýz buǵazy arqyly saǵat 17:43 shamasynda ótti. AIS júıesi qosylǵan buǵazdan ótken Pákistan týy bar tanker qazirgi ýaqytta Oman shyǵanaǵynda júrip jatyr, - dep jazady Anadolu Ajansı agenttigi.

MarineTraffic málimeti boıynsha, bul keıbir júkterge qaýipsiz ótýge ruqsat berilgenin kórsetedi.

Álemdik munaı tutyný kóleminiń 20%-y (kúnine shamamen 20 mıllıon barrel) ótetin Ormýz buǵazy munaı jetkizý turǵysynan strategııalyq mańyzǵa ıe ekendigi atalyp ótti. Biraq bul buǵazdaǵy qozǵalys is júzinde toqtap qalǵan bolatyn.

Kazinform úshin arnaıy Anadolu Ajansı seriktes agenttigi usynǵan.

Aıta keteıik, Irak Ormýz buǵazy jabylǵannan keıin eń iri munaı ken oryndarynyń jumysyn toqtatty.

AQSh prezıdenti Donald Tramptyń ákimshiligi bir apta ishinde Irannyń jaǵalaýymen ótetin Ormýz buǵazy arqyly kemelerdi alyp júrý úshin halyqaralyq koalıtsııa qurýdy josparlap otyr.