Iranǵa qatysty eń qatań nusqalardy qarastyryp jatyrmyz - Tramp
ASTANA.KAZINFORM - Irandaǵy oqıǵalar tóńiregindegi jaǵdaı Vashıngtonnyń jiti baqylaýynda, dep habarlaıdy Kazinform agenttiginiń menshikti tilshisi.
AQSh prezıdenti Donald Tramp narazylyq bildirýshiler qazasy týraly habarlamalarǵa baılanysty AQSh áskerı kúshteri Iranǵa qarsy árekettiń «eń qatań nusqalaryn» qarastyryp jatqanyn málimdedi.
Jeksenbi kúni Air Force One bortynda tilshilerge bergen suhbatynda Tramp Iran bıligi belgilengen qyzyl syzyqtan asa bastaǵanyn atap ótti.
.@POTUS on Iran: "We're looking at some very strong options... I'm getting an hourly report, and we're going to make a determination very soon." pic.twitter.com/XnDOCZSMpv
— Rapid Response 47 (@RapidResponse47) January 12, 2026
- Olar odan óte bastaǵan sııaqty. Qaza tapqan adamdar bar jáne bul bolmaýy kerek edi... Olar zorlyq-zombylyq arqyly bılik etip otyr, - dedi AQSh prezıdenti.
Ol jaǵdaıǵa óte baıypty qaraıtynyn jáne sheshim jaqyn arada qabyldanýy múmkin ekenin atap ótti.
- Áskerı kúshter bul máselemen aınalysyp jatyr jáne biz óte qatań nusqalardy qarastyryp jatyrmyz. Biz sheshim qabyldaımyz, - degen Tramp oqıǵalar týraly saǵat saıyn jańalyq alyp otyratynyn qosa aıtty.
Aq úı basshysy sonymen qatar Irannyń AQSh-qa ıadrolyq kelissózderdiń jańa kezeńin ótkizý týraly usynyspen júgingenin málimdedi.
- Kezdesýge daıyndyq júrip jatyr... Olar kelissóz júrgizgisi keledi. Biraq biz kezdesýge deıin áreket etýimiz kerek bolýy múmkin, - dedi ol.
Sonymen qatar, Reuters agenttiginiń habarlaýynsha, Tramp jaǵdaıdy negizgi keńesshilermen talqylaýdy josparlap otyr, al Vashıngton dıplomatııalyq qadamdardan bastap áskerı qadamdarǵa deıingi aýqymdy sharalardy qarastyryp jatyr.
Buǵan deıin Iran parlamentiniń spıkeri Mohammad Bager Galıbaf AQSh-tyń «qatelespeýin» eskertip, eger Iranǵa shabýyl jasalsa, basyp alynǵan aýmaqtar, sondaı-aq barlyq AQSh bazalary men kemeleri zańdy nysanaǵa aınalatynyn málimdegen bolatyn.
Amerıkalyq HRANA adam quqyqtary uıymynyń málimeti boıynsha, Irandaǵy narazylyq aktsııalary kezinde 490 demonstrant pen 48 qaýipsizdik qyzmetkeri qaza taýyp, 10 600-den astam adam ustaldy.
Iran sheneýnikteri bul sandarǵa qatysty túsinik bergen joq nemese ózderiniń qaza tapqandar sanyn jarııalamady.
Buǵan deıin Iran dúısenbide narazylyq aktsııalary kezinde qaza tapqandar úshin úsh kúndik ulttyq aza tutý jarııalaǵanyn habarlanǵan bolatyn.
