Iranǵa qarsy soǵystyń shabýyl kezeńi aıaqtaldy – AQSh memlekettik hatshysy
ASTANA. KAZINFORM – AQSh memlekettik hatshysy Marko Rýbıo Iranǵa qarsy soǵystyń shabýyl kezeńi aıaqtalǵanyn málimdedi, dep habarlaıdy VVS.
Onyń aıtýynsha, «Epıkalyq ashý» operatsııasy dep atalǵan AQSh pen Izraıldiń bastapqy shabýyldary qoıylǵan maqsattarǵa qol jetkizgennen keıin aıaqtalǵan.
– Biz beıbit joldy qalaımyz. Prezıdent Donald Tramp kelisim jasaýdy jón kóredi, – dedi ol jýrnalısterge.
Rýbıonyń bul málimdemesi Ormýz buǵazy aımaǵyndaǵy birqatar shabýyldardan keıin jasaldy. Bul jaǵdaı AQSh pen Iran arasyndaǵy bitimniń buzylý qaýpin kúsheıtti. AQSh Parsy shyǵanaǵynan osy mańyzdy sý joly arqyly shyǵýǵa tyrysyp jatqan kemelerge kómek kórsetýge nıetti ekenin málimdedi.
Tegeran ázirge Rýbıonyń sózderine túsinikteme bergen joq. Alaıda buǵan deıin Iran parlamentiniń spıkeri Mohammed Galıbaf «qazirgi jaǵdaıdyń saqtalýy AQSh úshin qolaısyz ekenin jaqsy túsinemiz, bul tek bastamasy ǵana» dep málimdegen.
Ótken aıda AQSh-pen ótken kelissózderde Irannyń bas kelissóz júrgizýshisi bolǵan Galıbaf teńizdegi qaýipsizdikke qaýip tóngenin atap ótti.
– Keme qatynasy men energııa tasymalynyń tranzıti atysty toqtatý rejıminiń buzylýy men AQSh jáne onyń odaqtastarynyń blokadasyna baılanysty qaýipke ushyrady. Alaıda olardyń áreketteri nátıje bermeıdi, – dedi ol.
Seısenbi kúni keshke Ulybrıtanııanyń teńiz saýda operatsııalary basqarmasy (UKMTO) dereginshe, tekserilgen aqparat kózine súıensek, Ormýz buǵazynda júk kemesine «belgisiz snarıad» tıgen. Qosymsha málimetter ázirge jarııalanǵan joq.
Buǵan deıin Birikken Arab Ámirlikteri eki kún qatarynan Irannyń zymyrandary men drondaryn áýe qorǵanysy júıelerimen toıtaryp jatqanyn habarlaǵan. Dúısenbi kúni Ámirlikter Irandy Fýdjeıra ámirligindegi munaı portyna soqqy jasady dep aıyptap, ony «qaýipti shıelenisý» dep ataǵan.
Al Iran bul aıyptaýlardy joqqa shyǵaryp, eger mundaı áreketter jasalsa, ony ashyq málimdeıtinin aıtty.
«Epıkalyq ashý» operatsııasy 28 aqpanda bastalǵan. Sol kúni AQSh pen Izraıl Iranǵa birqatar áýe soqqylaryn jasaǵan. Buǵan jaýap retinde Tegeran álemdik munaı men suıytylǵan tabıǵı gaz jetkiziliminiń shamamen 20%-y ótetin mańyzdy sý jolyn – Ormýz buǵazyn buǵattaǵan.
Aıta keteıik, buǵan deıin AQSh Ormýz buǵazyndaǵy shabýyldarǵa baılanysty Iranmen atysty toqtatý týraly kelisimdi kúshinde qaldyrǵanyn jazdyq.
Sondaı-aq AQSh Irannyń birneshe katerin joıǵanyn rastady.
