Irandyqtar zorlyq-zombylyqqa qarsy shyǵýda - BAQ
ASTANA. QazAqparat - Lýrestan, Hýzestan, Ilam, Kým, Kermanshah, Gúlstan, Markazı provıntsııalarynda turyp jatqan ırandyqtar sońǵy kúnderi Irannyń ár túrli qalalarynda bolyp jatqan tártipsizdikter men zorlyq-zombylyqqa qarsylyq bildirip kóshege shyqty, dep habarlaıdy IRNA.
Agenttiktiń málimetinshe, ereýilshi top qoldaryna Aıatolla Álı Hameneıge qoldaý bildirý jáne zorlyqqa qarsylyq jaıly uran ustap shyqty. Sonymen qatar olar ıran halqynyń zańdy talaptaryn oryndaý qajet ekenin de jetkizgen.
Narazylyq sherýlerine eldegi ekonomıkalyq jaǵdaı, jemqorlyq, baǵanyń kóterilýi jáne jumyssyzdyq sebep bolǵan. Alaıda, keıbir opportýnıster osy oqıǵalardy teris nıette paıdalanyp, ıran halqynyń quqyqtaryn buzyp, qoǵamdyq menshigine zalal keltirýde, dep jazady agenttik.
28 jeltoqsannan beri órship turǵan Irandaǵy kóshelerindegi ereýil saldarynan 20 shaqty adam qaza bolǵan.
Buǵan deıin Iran prezıdenti Hasan Rýhanı qarsylyq aktsııalarynyń órship ketýine el ishindegi máselelermen qatar syrtqy kúshterdiń de yqpaly bar ekenin aıtqan.
Sonymen qatar Rýhanı ekonomıkalyq problemalardy sheshýdegi jumysty belsendi jolǵa qoıatynyn aıtyp ýáde bergen. «Úkimet jumyssyzdyq, ekologııa jáne ınflıatsııa máselesin sheshý jumystaryna barynsha kúsh salady», - dedi ol.
