Irandyqtar Semeıde et óńdeý kombınatyn salmaqshy
ASTANA. QazAqparat - «KazakhInvest» AQ-nyń qoldaýymen ırandyq ınvestor Shyǵys Qazaqstan oblysy Semeı qalasynyń «Óndiris» ındýstrııaldy aımaǵynda «Halal» standartyna saı qaıta óńdeý et kombınatyn salý jobasyn iske asyrý úshin ınvestıtsııalyq kelisimshart jasady. Bul týraly QR Investıtsııalar jáne damý mınıstrligi habarlaıdy.
Baspasóz málimetterine qaraǵanda, «AgroPortal» kompanııanyń bas dırektory Amır Shekarchı Qazaqstan Respýblıkasynyń Investıtsııalar jáne damý mınıstrligi Investıtsııalar komıtetimen birge ınvestıtsııalyq preferentsııalar usynýdy qarastyratyn jobalardy iske asyrý kelisimshartyn jasady.
Jobaǵa shamamen 7 mlrd. teńge shetel ınvestıtsııasy salynady. Sóıtip, bıyl Shyǵys Qazaqstan oblysynda etti qaıta óńdeıtin kombınat qurylysy bastalady.
«Qazaqstanda shetel ınvestorlary úshin jaǵymdy ınvestıtsııalyq klımat jasalǵan. Óńirlik deńgeıde biz «KazakhInvest» UK» AQ ókilderimen jáne bizdiń jobaǵa jan-jaqty qoldaý kórsetetin Shyǵys Qazaqstan oblysynyń ákimdigimen tyǵyz jumys isteımiz. Et kombınatynda «Óndiris» aýmaǵynda zamanaýı, qaldyqsyz óndiristik jeliler salynǵan bolatyn. Zaýytta shamamen 250 adam jumys isteıtin bolady», - dedi «Agro Portal» bas dırektory Amır Shekarchı.
Et kombınatynda táýligine 2 myń usaq maldyń jáne 400 bas iri qaranyń eti qaıta óńdeletin bolady.
Mundaǵy ónimniń 90%-ke jýyǵy Iran Islam Respýblıkasyna eksporttalady.
«Kazakh Invest» etti qaıta óńdeý zaýytyn salý arqyly osy jobany iske asyrýda qoldaý kórsetý qyzmetin jalǵastyrady. Kún tártibinde - keden jáne salyq preferentsııalaryn alý, sýbsıdııalaý, sondaı-aq, vızalyq qoldaý máseleleri bar», - dedi «Kazakh Invest» óńirlik dırektory Madına Baısalbaeva.
Jýyrda ırandyq ınvestordyń shaqyrýymen jáne «Kazakh Invest» AQ-nyń qoldaýymen oblys ákiminiń orynbasary Shalqar Baıbekov bastaǵan Shyǵys Qazaqstan oblysynyń delegatsııasy Iranǵa barady. Sapar barysynda bordaqylaý alańshalary men sút-taýarly fermalaryna barý jáne olardyń jumysymen tanysý, aýylsharýashylyq jabdyǵyn óndirýshilerimen kezdesý, qazaqstandyq et ónimderiniń ımportyna qyzyǵýshylyq tanytqan seriktestermen sóılesý, sondaı-aq, AÓK salasy boıynsha birqatar jobalar usynylatyn áleýetti ınvestorlarmen júzdesý josparlanǵan.
2018-2022 jyldarǵa arnalǵan Ulttyq ınvestıtsııalyq strategııada tikeleı shetel ınvestıtsııalaryn tartatyn basym salalardyń biri retinde agroónerkásiptik keshen tańdalyp otyr. Qazaqstanda 2015 jyl men 2017 jyldyń 9 aıyn qosqanda aýyl sharýashylyǵyna tartylǵan ınvestıtsııanyń jalpy kólemi 135,2 mln. AQSh dollaryn qurady.
