Irandyqtar 1393-shi jańa jyldy qarsy alýda

ASTANA. QazAqparat - Iranda búgin kún kúntizbesi boıynsha Novrýzdy, ıaǵnı Jańa jyldy qarsy alýda. Bul 1393 jańa jyl, óıtkeni Iranda Hıjra jyl sanaýy qoldanylady.

Merekeden keıin eki aptalyq demalys bastalady. Bul kúnderi Tegeranda adam qalmaıdy, óıtkeni barlyq tegerandyqtar demalystaryn tabıǵat aıasynda, Kaspıı jaǵasynda ótkizgendi jón kóredi.

Iranda Islam paıda bolǵannan kóp ýaqyt buryn toılanatyn Novrýzdyń barlyq salt-dástúrleri jaqsy saqtalǵan. Eń aldymen mereke bastalmas buryn bir nemese birneshe altyn balyq satyp alynyp, olar bir ydysqa salynyp, mereke kúngi dastarhan basyna qoıylady.

Sonymen qatar, dastarhanǵa mindetti túrde jeti túrli taǵam tartylady. Olardyń ataýy da parsy álipbıindegi «sın», ıaǵnı «s» árpimen bastalady. Sondaı-aq, bul kúni dastarhanǵa Quran qoıylyp, aına, maısham, boıalǵan jumyrtqalar, gúl jáne tıyndar ornalastyrylady.

Jańa jyl kirisimen ırandyqtar bir-birin quttyqtaý úshin úı-úıdi aralaıdy. Jastar aldymen úlkenderge baryp sálem beredi, sosyn úlkender jastardyń úılerine bas suǵady. Mundaǵy basty maqsat, eski renishterdi umytyp, júrekterge mahabbat pen baýyrmaldyq ornatý.

Sonymen qatar, ırandyqtar túrki halyqtaryndaǵy naýryz kóje sııaqty «súmele» ázirlep, kelgen qonaqtaryna tartady