Irandyq kompanııa Aqtaý men Gorgan arasynda áýe reısin ashýy múmkin
ALMATY. QazAqparat - Qazaqstanda Aqtaý-Gorgan arasynda áýe reısi ashylýy múmkin, dep habarlaıdy QazAqparat tilshisi.
Irandyq «Pouya Air» áýe kompanııasy QR Indýstrııa jáne ındýstrıaldyq mınıstrligi Azamattyq avıatsııa komıtetine Qazaqstan Respýblıkasynda sheteldik tasymaldaýshy akkredıtatsııasynan ótýge ótinish berdi.
«Pouya Air» avıakompanııasy 2019 jyldyń kóktemgi-jazǵy navıgatsııa kezeńinen bastap alǵash ret Aqtaý - Gorgan baǵytynda tikeleı halyqaralyq reısterdi oryndaýdy josparlap otyr. Reıster jıiligi aptasyna 2 ret Embraer-145 áýe kemesimen júrgiziledi. Reısterdi ashý aldaǵy ýaqytta Qazaqstan men Iran arasyndaǵy ózara saýda-ekonomıkalyq qarym-qatynasty damytýǵa múmkindik beredi. Sondaı-aq, Aqtaý qalasynyń áýejaıyna kelip-ketetin jolaýshylar aǵynyn arttyrady», - dedi Azamattyq avıatsııa komıtetinen.
