Irandyq ınvestorlar OQO-nyń ınvestıtsııalyq múmkindikterine qyzyǵýshylyq tanytýda
ASTANA. QazAqparat - Oblys ákimi B.Atamqulov ırandyq «Jahade Sabz» kompanııasynyń basshylyǵyn qabyldady, dep habarlaıdy ákimdiktiń baspasóz qyzmeti.
«Óńir basshysy qonaqtardy oblystyń ınvestıtsııalyq múmkindikterimen tanystyryp, óńirdiń joǵary óndiristik-ekonomıkalyq áleýeti jóninde sóz qozǵady», delingen habarlamada.
Ákim Ońtústik Qazaqstan oblysy ekonomıkasynyń basty baǵyty aýyl sharýashylyǵy bolyp tabylatynyn atap ótti. Kezdesý barysynda sýarmaly jerlerdi ıgerý, sondaı-aq, alma baýlaryn otyrǵyzý, dándi jáne maıly daqyldar egý boıynsha ınvestıtsııalyq jobalardy iske asyrý máseleleri talqylandy.
Óz kezeginde sheteldik qonaqtar tehnıkalyq sala, eginshilik jáne saýda-sattyq salalarynda mol tájirıbesi bar ekendigin alǵa tartty. Bul rette oblys ákimi quzyrly organdarǵa ırandyq kompanııanyń jobalaryn iske asyrý barysynda jan-jaqty qoldaý kórsetýdi tapsyrdy.
