Irandy ShYU músheligine qabyldaý máselesi Samarqandtaǵy prezıdentter sammıtinde qaralady

TAShKENT. QazAqparat – Iran Islam Respýblıkasyna Shanhaı yntymaqtastyǵy uıymyna (ShYU) múshe memleket mártebesin berý máselesi Samarqandta ótetin ShYU elderi prezıdentteriniń sammıtinde qaralady, dep habarlaıdy QazAqparat.

Búgin Qazaqstan Respýblıkasy Premer-Mınıstriniń orynbasary - Syrtqy ister mınıstri Muhtar Tileýberdi bastaǵan qazaqstandyq delegatsııa Ózbekstan Respýblıkasynyń tóraǵalyq etýimen Shanhaı yntymaqtastyq uıymyna múshe memleketterdiń Syrtqy ister mınıstrleri keńesiniń kezekti otyrysyna qatysty.

ShYU elderiniń syrtqy saıası vedomstvolarynyń basshylary bıylǵy qyrkúıekte Samarqand qalasynda ótetin ShYU-ǵa múshe memleketter basshylarynyń sammıtine daıyndyq sheńberinde uıym qyzmetiniń túrli baǵyttaryndaǵy ózara is-qımyldyń aǵymdaǵy jaı-kúıi men damý perspektıvalaryn, onyń halyqaralyq jáne óńirlik isterdegi róli men ornyn arttyrýdy talqylady.

Qazaqstan, Qytaı, Qyrǵyzstan, Pákistan, Ózbekstan, Reseı, Tájikstan jáne Úndistan syrtqy ister mınıstrleri Samarqand deklaratsııasy saıası qujatynyń jobasyn qarap, negizge aldy, sondaı-aq uıymnyń qazirgi qyzmeti boıynsha birqatar basqa sheshimderge qol qoıdy.

Budan bólek, sharaǵa qatysýshylar ShYU-ǵa múshe memleket mártebesin alý maqsatynda Iran Islam Respýblıkasynyń mindettemeleri týraly memorandýmǵa qol qoıý týraly máseleni memleketter basshylary keńesiniń qaraýyna engizý týraly sheshim qabyldady.

Mınıstrler ShYU-nyń Mysyr Arab Respýblıkasymen, Saýd Arabııasy Koroldigimen jáne Katar Memleketimen dıalog boıynsha áriptes mártebesin berý týraly memorandýmdarǵa qol qoıylýyn quptady.

ShYU elderi delegatsııalarynyń basshylaryn Ózbekstan Respýblıkasynyń Prezıdenti Shavkat Mırzıeev qabyldady. Suhbat barysynda óńirdegi ahýal men ShYU aıasyndaǵy ózara is-qımyl jónindegi ózekti máseleler, sondaı-aq uıymnyń aldaǵy sammıtine daıyndyq barysy qozǵaldy.