Irandyqtar 1979 jylǵy Islam revolıýtsııasynyń 46 jyldyǵyn atap ótip jatyr
ASTANA. KAZINFORM – Iranda Iran Islam Respýblıkasynyń qurylýyna sebep bolǵan 1979 jylǵy Islam revolıýtsııasynyń 46 jyldyǵyna oraı jalpyulttyq sherýler ótip jatyr, dep habarlaıdy Kazinform menshikti tilshisi.
Dúısenbi kúni tańerteń adamdar Tegeran men basqa da qalalar, eldi mekender men aýyldardaǵy mıtıngiler men sherýlerge qatysty, dep habarlaıdy IRNA.
Irannyń 1400 qalasy men eldi mekeninde jáne 35 myńnan astam aýylda sherýler jergilikti ýaqyt boıynsha saǵat 09:30-da bastaldy.
Halyq tarıhı oqıǵanyń qurmetine urandatyp, Irannyń ulttyq týyn jelbiretti.
Iran prezıdenti Masýd Pezeshkıan Tegerandaǵy Azadı alańyna jınalǵan jurtshylyq aldynda sóz sóıledi.
Ol 46 jyl buryn dál osy kúni Iran halqy zulymdardy elden qýǵanyn málimdedi.
Onyń aıtýynsha, Irannyń tabysy – ulttyq birlik pen halyqtyń ulttyq isterge belsendi qatysýynda.
- Dushpandar Iran álsirep qalǵandaı áser qaldyrý úshin alaýyzdyq pen arazdyq týdyrýǵa tyrysyp jatyr, biraq Islam revolıýtsııasy jetekshisiniń parasattylyǵy men danalyǵy jáne halyqtyń oqıǵa ornynda bolýynyń arqasynda olardyń armany oryndalmaıdy, - dedi prezıdent.
Pezeshkıan aıatolla Hameneıdiń basshylyǵymen Iran óz dushpandarynyń barlyq qastandyqtaryna toıtarys beretinine ýáde berdi.
- Olar ózderi lańkes bolǵanymen, bizdi terrorıst dep ataıdy, - degen ol Irannyń lańkestiktiń qurbany ekenin qosa aıtyp.
Keıinirek Pezeshkıan óz sózinde AQSh prezıdenti Donald Tramptyń Iranmen kelissózder júrgizýge umtylatyny týraly málimdemesin qabyldamaı, Vashıngtonnyń bir mezgilde Islam Respýblıkasyn buzýǵa baǵyttalǵan áreketine nazar aýdardy.
- Tramp kelissóz júrgizgisi keletinin aıtady, biraq sonymen birge ol Islam revolıýtsııasyn tize búktiretin barlyq yqtımal josparǵa qol qoıyp, jarııalap júr», - dedi Pezeshkıan Vashıngtonnyń Iranǵa «maksımaldy qysym jasaý» naýqanyna silteme jasap.
- Olar kelissóz júrgizgimiz keledi deıdi, eger shynymen kelissóz júrgizýdi kózdeseńiz, nege bul aqymaq isterge bardyńyz? – dedi Iran prezıdenti AQSh-tyń qysym kórsetý taktıkasyn joqqa shyǵaryp.
Ulttyq birliktiń qajettigin basa aıtqan Pezeshkıan Irannyń tabysy yntymaqta ekenin málimdedi.
Prezıdent ırandyqtarǵa sóılegen sózinde el basshysynyń basshylyǵymen ádiletsizdik, kedeılik jáne ekonomıkalyq qıyndyqtarmen kúresýge ýáde berdi.
Osyǵan deıin Irannyń AQSh-tyń keme qatynasyna qatysty jańa sanktsııalaryn aıyptaǵany týraly jazdyq.
