Irandyq tarap mal men qus sharýashylyǵy salasynda tájirıbe almasýǵa qyzyǵýshylyq tanytyp otyr
ASTANA. KAZINFORM — Premer-mınıstr Oljas Bektenov Iran Islam Respýblıkasynyń aýyl sharýashylyǵy jıhady mınıstri Golamreza Nýrı Gezeldje bastaǵan delegatsııamen kezdeti. Bul týraly Úkimettiń baspasóz qyzmeti habarlady.
Kezdesýge Aýyl sharýashylyǵy mınıstri Aıdarbek Saparov, saýda jáne ıntegratsııa mınıstri Arman Shaqqalıev, Mańǵystaý oblysynyń ákimi Nurdáýlet Qılybaı jáne basqa da ókilder qatysty.
Jıynda saýda-ekonomıkalyq, ǵylymı-tehnıkalyq jáne mádenı yntymaqtastyq jónindegi Qazaqstan-Iran úkimetaralyq komıssııasynyń 20-shy otyrysy jumysynyń nátıjelerine nazar aýdaryldy.
Eki eldiń aýyl sharýashylyǵy salasyndaǵy yntymaqtastyqty odan ári damytý, atap aıtqanda, aýyl sharýashylyǵy ónimderi boıynsha saýda-sattyqty arttyrý jáne tranzıttik-logıstıkalyq ınfraqurylymdy damytýǵa járdemdesý jónindegi tıisti vedomstvolardyń birlesken josparlary qaraldy.
Qazaqstan astyq eksporty kólemin jylyna 2 mln tonna bıdaı men 1 mln tonna arpaǵa deıin jetkizýge múddeli. Bıylǵy 4 aıda qazaqstandyq AÓK ónimderiniń eksporty 3 esege ósip, $116 mln boldy. Irandyq tarap mal sharýashylyǵy men qus sharýashylyǵy salasynda tájirıbe almasýǵa qyzyǵýshylyq tanytty.
Qosylǵan quny joǵary aýyl sharýashylyǵy ónimderin qaıta óńdeý boıynsha birlesken jobalardy júzege asyrý keleshegi zor baǵyt sanalady. Elimizde Kaz-Ir Agro kompanııasynyń maqsary maıyn óndiretin jáne Solico Group frı kartobyn shyǵaratyn zaýyttaryn iske qosý tájirıbesi negizinde ınvestıtsııalyq yntymaqtastyqty damytý máseleleri talqylandy.
Kólik jáne logıstıka salasyndaǵy ózara is-qımyldy talqylaý barysynda kezdesýge qatysýshylar Kaspıı teńiziniń tranzıttik áleýetin arttyrýǵa jáne «Soltústik – Ońtústik» kólik dáliziniń múmkindikterin keńeıtýge birlesken múddelerin bildirdi. Bıylǵy 5 aıda Qazaqstan arqyly atalǵan baǵyt boıynsha júk tasymaldaý kólemi 74%-ǵa artyp, 1,5 mln tonnaǵa jetti.
Kezdesý qorytyndysy boıynsha eki eldiń tıisti memlekettik organdary saýda-ekonomıkalyq yntymaqtastyqty arttyrý jónindegi belgilengen josparlardy jedel júzege asyrý úshin jumys tobyn qurǵany atap ótildi.
Anyqtama: 2024 jyly Qazaqstan men Iran arasyndaǵy taýar aınalymy $340 mln-nan asty. Osy jyldyń 4 aıynda bul kórsetkish 78,3%-ǵa artyp, $173,5 mln-ǵa jetti.
Aıta ketelik Oljas Bektenov Santıago de Gomar Rokamen Qyzylorda oblysyndaǵy zaýyt qurylysyn talqylaǵan edi.