Irandyq Nobel syılyǵynyń ıegeri Nargız Mohammadı bas bostandyǵynan aıyryldy

ASTANA. KAZINFORM — Otyz jyldan beri áıel quqyǵy úshin kúresip kele jatqan ırandyq belsendi jáne Nobel syılyǵynyń ıegeri Nargız Mohammadı jeksenbi kúni 7 jyl 6 aıǵa bas bostandyǵynan aıyryldy. Ol buǵan deıin de birneshe ret túrmege toǵytylǵan, dep habarlaıdy Reuters.

Nargız qorynyń málimdemesine sáıkes, 53 jastaǵy Mohammadı bir aptalyq ashtyq jarııalap, ol jeksenbi kúni aıaqtaldy. Onyń advokaty Mýstafa Nılıdiń aıtýynsha, sot úkimi senbi kúni shyqqan.

Irannyń Syrtqy ister mınıstrligi bul jaǵdaıǵa qatysty túsinikteme bergen joq. 

Repressııaǵa qarsy kúresimen tanymal Nargız Mohammadı byltyr 12 jeltoqsan kúni advokat Hosroý Alıkordıdiń ólimi kúdik týdyratynyn aıtyp, narazylyq tanytqany úshin qamaýǵa alyndy. 

Qazir Mohammadı Meshhedtegi ýaqytsha ustaý ızolıatorynda otyr.

— Birneshe apta boıy oqshaýlanyp, onymen habar alý tolyǵymen úzilgennen keıin, ol óziniń advokatymen telefon arqyly qysqa ǵana sóılesip, hal-jaǵdaıyn baıandady, — delingen qordyń habarlamasynda.

Sot úkimi boıynsha ol jıyndar ótkizgeni úshin 6 jylǵa bas bostandyǵynan aıyryldy. Sondaı-aq eki jylǵa Hýsf qalasyna jer aýdarylyp, bir jarym jylǵa shetelge shyǵýǵa tyıym salyndy.

Aıta keteıik, Nargız Mohammadı 2023 jyly túrmede otyrǵanda Irandaǵy áıelder quqyǵyn  qorǵaý jáne ólim jazasyn joıý qozǵalysy úshin Nobel syılyǵyn aldy.