Irandyq kompanııa Qazaqstanda irimshik pen balalar taǵamyn óndiredi
ASTANA. KAZINFORM — Elordada Qazaqstan-Iran bıznes forýmy bastaldy. Sharaǵa 500-ge jýyq qatysýshy jınaldy jáne olardyń júzden astamy — ırandyq kásipkerler.
Forým aıasynda Kazakh Invest ulttyq kompanııasy yntymaqtastyq týraly eki kelisimge qol qoıýdy josparlap otyr.
— Birinshi kelisim — Irannyń Solico Group kompanııasymen jasalady. Bul kompanııa Qazaqstanda birneshe jobany júzege asyrýdy josparlap otyr. Alǵashqy joba sútti qaıta óńdeý men irimshik jasaý salasyna qatysty. Qazir Almaty oblysynda 16 gektar aýmaqta nysandardyń qurylysy bastalyp ketti. Investıtsııa kólemi shamamen 100-150 mıllıon dollarǵa jetedi. Іrimshik óndirisi iske qosylǵan soń, jobanyń ekinshi fazasy — balalar taǵamyn óndirý josparlanyp otyr. Solico Group — agroónerkásip salasynda jumys isteıtin Irandaǵy eń iri korporatsııalardyń biri, — dedi Kazakh Invest ulttyq kompanııasy basqarma tóraǵasynyń orynbasary Madııar Sultanbek agenttikke bergen suhbatynda.
Ekinshi kelisim taý-ken metallýrgııa salasyndaǵy Irannyń Kavand Nahan Zamin kompanııasymen ornatylmaq.
— Olar on jyl buryn, 2015 jyly Qaraǵandy oblysynyń Aqtoǵaı aýdanynda mys ken ornyn satyp alǵan bolatyn. Qazir Qazaqstanda jumys istep, jylyna 5 myń tonnaǵa jýyq katodty mys óndiredi. Endi biz olarmen óndiristi keńeıtý, kólemdi arttyrý jáne qaıta óńdeý deńgeıin ósirý jóninde yntymaqtastyq kelisimine qol qoıamyz. Búginde bul kompanııa nysandarynda júzdegen azamatymyz jumys isteıdi. Al óndiris keńeıse, taǵy myń jarym jumys orny ashylady. Sondyqtan biz ırandyq kompanııalarmen yntymaqtastyqqa óte qýanyshtymyz. Iran — Taıaý Shyǵystaǵy eń myqty ekonomıkalardyń biri, — dep túıindedi M. Sultanbek.
Spıkerdiń aıtýynsha, Qazaqstanda ıran kapıtalynyń qatysýymen 650-den astam uıym tirkelgen. Jınalǵan ınvestıtsııalar kólemi búginde 200 mıllıon dollardan asady.
Buǵan deıin Aqordada Memleket basshysy Qasym-Jomart Toqaev elimizge resmı saparmen kelgen Iran Islam Respýblıkasynyń Prezıdenti Masýd Pezeshkıandy qarsy alǵanyn jazǵan edik.
Qazirgi ýaqytta taraptar joǵary deńgeıdegi kelissózder júrgizip jatyr. Onyń barysynda saýda-ekonomıkalyq, kólik-logıstıka jáne mádenı-gýmanıtarlyq salalardaǵy qazaq-ıran yntymaqtastyǵyn odan ári nyǵaıtý máseleleri talqylanbaq.
Buǵan deıin Kazinform-nyń analıtıkalyq sholýshysy Astana men Tegeran arasyndaǵy kelissózdiń astaryna úńilip kórgen edi.