Irandyq fýtbolshylar Aýstralııadan saıası baspana suraǵan ótinishterin qaıtaryp aldy
ASTANA. KAZINFORM – Iran áıelder fýtbol quramasynyń úsh múshesi Avstralııada bergen saıası baspana suraý ótinishterinen bas tartyp, elden ketken. Bul týraly Qazınform agenttigi Ál-Jazıra telearnasyna silteme jasap habarlady.
BAQ málimetinshe, eki fýtbolshy men komanda qyzmetkeri buǵan deıin otanynda qýdalanýy múmkin degen qaýipke baılanysty baspana berý týraly ótinishterin keri qaıtaryp alǵan. Mundaı qaýiptiń týyndaýyna komanda Azııa kýbogy týrnırinde Irannyń memlekettik ánuranyn oryndaýdan bas tartýy sebep bolǵan.
Irannyń memlekettik teleradıo kompanııasy senbi kúni sportshylardyń Aýstralııadan baspana suraý ótinishinen bas tartyp, Malaızııaǵa baǵyt alǵanyn habarlady. Efırde áıelderdiń ushaq bortyna minip jatqan sáti beınelengen sýret kórsetilgen.
Jeksenbi kúni bul aqparatty Aýstralııanyń ishki ister mınıstri Tonı Berk rastady.
Onyń aıtýynsha, túnde Iran quramasynyń úsh múshesi elge qaıtyp jatqan komandaǵa qosylý týraly sheshim qabyldaǵan. Mınıstr sondaı-aq Aýstralııa bıligi habardar etilgennen keıin sportshylarǵa birneshe ret múmkin bolatyn ári qaraıǵy áreketterdi talqylaý usynylǵanyn aıtty.
Iran áıelder quramasy Aýstralııanyń Kvınslend shtatyndaǵy Gold-Kost stadıonynda ótken týrnırge qatysý úshin sol elde bolǵan.
Jarys kezinde, 28 aqpanda AQSh pen Izraıl Iranǵa qarsy áskerı operatsııa bastaǵan.
Al alǵashqy matchta ırandyq fýtbolshylar eldiń memlekettik ánuranyn oryndaýdan bas tartqannan keıin Iran memlekettik teleradıo kompanııasynyń júrgizýshisi olardy «satqyndar» dep ataǵan. Keńinen taraǵan málimdemesinde ol oıynshylardyń áreketin ar-namystyń eń tómengi deńgeıi dep baǵalap, olar qatań jazalanýy tıis ekenin aıtqan.
Osy málimdemelerden keıin kásibı fýtbolshylardyń FIFPRO halyqaralyq qaýymdastyǵy FIFA men Azııa fýtbol konfederatsııasyn sportshylardy qorǵaý úshin shara qabyldaýǵa shaqyrdy. Buǵan aýstralııalyq buqaralyq aqparat quraldarynda oıynshylardy Iran bıliginiń ókilderi baqylap júrgeni týraly habarlardyń taraýy sebep bolǵan.
Óz kezeginde Iran fýtbol federatsııasy Aýstralııany oıynshylardy «urlap áketti» dep aıyptap, olardy otanyna qaıtýdan bas tartýǵa májbúrledi dep málimdedi.
Aıta keteıik, Iran quramasynyń fýtboldan álem chempıonatyna qatyspaıtyny belgili boldy.
