Irandy eshkim sheginýge májbúrleı almaıdy – Eldiń joǵarǵy kóshbasshysy Trampqa jaýap berdi

ASTANA. KAZINFORM – Aıatolla Hameneı Irannyń tańylǵan soǵysqa da, tańylǵan beıbitshilikke de kónbeıtinin aıtty, dep habarlaıdy Kazinform tilshisi. 

Iran Islam Respýblıkasynyń rýhanı jetekshisi Aıatolla Seıed Álı Hameneı sársenbi kúni teledıdar arqyly sóılegen sózinde AQSh-qa Iranǵa qarsy áskerı qımyldar bastalsa, zardaby aýyr bolatynyn eskertti. 

Onyń málimdemesi AQSh prezıdenti Donald Tramptyń Tegerannan «sheginýdi» talap etken qoqan-loqqysynan keıin jasaldy.

– Amerıkalyqtar Iranǵa qarsy kez kelgen áskerı aralasý olarǵa orny tolmas zalal ákeletinin túsinýi kerek. Biz tańylǵan soǵysqa berilmeımiz jáne tańylǵan beıbitshilikti qabyldamaımyz. Eshkim Irandy sheginýge májbúrleı almaıdy, - dedi Hameneı.

Rahbar Aq úı basshysynyń qoqan-loqqysyn aıyptap, ony «dóreki» ári «qabyldanbaıtyn» dep atady. 

Ol «Iran tarıhynan habary bar dana adam» eshqashan Tegeranǵa ýltımatým tilimen júginbeıtinin atap ótti.

– Iran halqy kúshteýmen beriletin halyq emes. Biz táýelsizdigimizdi, qaýipsizdigimiz ben abyroıymyzdy qorǵaýda tabandylyq tanytamyz, - dep qosty ol.

Hameneı óz úndeýinde Izraıldiń Iran terrıtorııasyna jasaǵan keıingi soqqylaryna jaýap qaıtarǵan azamattardyń áreketine de toqtaldy. Ol Izraıl basqynshylyǵyna qarsy áreketti «batyl ári der kezinde jasaldy» dep baǵalap, munyń Iran qoǵamynyń jetilgeni men rýhanı kúsh-qýatyn aıǵaqtaıtynyn basa aıtty.

– Biz Iran halqynyń agressııaǵa qarsy qalaı sabyrly ári berik bolǵanyn maqtan tutamyz. Bul tereń sana men ulttyq qadir-qasıetti kórsetedi, - dedi ol. 

Hameneıdiń joldaýy aımaqtaǵy qarama-qaıshylyqtardyń kúsheıýi jáne AQSh-ta Irannyń jer astyndaǵy ıadrolyq nysandaryna soqqy berýge qatysý múmkindigi týraly talqylaýlar tusynda aıtyldy. 

Aıta keteıik, AQSh prezıdenti sársenbi kúni Irannyń Joǵarǵy Kóshbasshysyn joıý múmkindigi týraly málimdegen bolatyn.