Irandaǵy jer silkinisi qurbandarynyń sany 250 adamǵa jetti
ASTANA. 12 tamyz. QazAqparat - Irandaǵy jer silkinisi qurbandarynyń sany 250 adamǵa, zardap shekkkender 2 myń adamǵa jetti, dep habarlady RBK ırandyq resmı Press TV telearnasyna silteme jasap.
Budan buryn 180 adamnyń qaza bolǵany jáne 1 myń 500 adam zardap shekkeni habarlanǵan bolatyn. Ókimet oryndary qurbandar sany kóbeıýi múmkin dep qaýiptenýde, óıtkeni qutqarýshylar úıindilerdi arshý jumystaryn jalǵastyrýda. Sondaı-aq jaraqattanǵandardyń kópshiliginiń jaǵdaıy aýyr halde.
Jerasty dúmpýleriniń saldarynan eldiń soltústik-batysynda tórt eldi meken túgeldeı qırady, 60-tan astam eldi meken ishinara búlindi.
Irannyń zardap shekken aýdandarymen baılanys úzildi, óıtkeni jerasty dúmpýleri kommýnıkatsııalyq jelilerge zardap keltirdi.
Myńdaǵan adamdar úılerin tastap shyqty jáne olardyń kópshiligi úılerine oralýǵa qaýiptenýde, óıtkeni negizgi dúmpýler keminde 20 ret qaıtalandy. Ókimet oryndary turǵyndardy shatyrlarda túneýge shaqyrýda.
11 tamyzda Irannyń soltústik-batysynda terbelisi 6,4 jáne 6,3 balldyq eki jer silkinisi boldy. Tegran ýnıversıtetiniń seısmologııalyq ortalyǵynyń málimetterine qaraǵanda, jer silkinisiniń kindigi Tebrız qalasynan 60 shaqyrym jerde 10 shaqyrym tereńdikte bolǵan. Kúshti jerasty dúmpýleri Armenııada da sezildi - Erevannyń kóptegen turǵyndary úılerinen qashyp shyǵýǵa májbúr boldy.
Iran ǵalamshardyń seısmıkalyq qaýipti aımaqtarynyń biri. Budan buryn 2003 jylǵy jeltoqsanda ıslam respýblıkasynyń aýmaǵynda bolǵan zilzala saldarynan Bam qalasy qırap, 26 myń adam qaza boldy.
1990 jyly eldiń soltústigindegi Mandjıl, Rýbdar jáne Lýshan qalalaryn qıratqan jer silkinisi 40 myń adamnyń ómirin qıdy. 1978 jylǵy jer silkinisi Tebes qalasyn túgeldeı qıratyp, 22 myń turǵyndy qazaǵa ushyratty.
