Irandaǵy Qazaqstan elshiligi qalypty jumys istep tur - SІM

ASTANA. QazAqparat – Qazaqstannyń Tegerandaǵy elshiligi qalypty rejımde jumys istep tur. Bul týraly QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

«Bul tek bir ǵana jaǵdaı. Eger Tegeranda ornalasqan elshilikterge jappaı shabýyl jasalsa, onda jaǵdaı basqasha bolar edi. Elshilik qalypty jumys istep jatyr», - dedi Aıbek Smadııarov.

Onyń aıtýynsha, bul jaǵdaıdan zardap shekken Qazaqstan azamattary týraly málimet joq.

Eske sala keteıik, 27 qańtarda Ázerbaıjan Respýblıkasynyń Tegerandaǵy Elshiligine qarýly shabýyl jasalǵan bolatyn.

Bolǵan jaǵdaıǵa qatysty málimdeme jasaǵan QR Syrtqy ister mınıstrligi shabýyldy qatań aıyptady.

Saıası vedomstvo Iran Islam Respýblıkasynyń bıligi bul oqıǵany muqııat tergep, kinálilerdi jazalaý úshin tıisti sharalar qoldanatynyna senim bildirdi.