Irandaǵy jappaı narazylyq: 35 adam qaza taýyp, 1200 adam qamaýǵa alyndy
ASTANA.KAZINFORM - Iranda toǵyz kúnge sozylǵan narazylyq kezinde kem degende 35 adam qaza taýyp, 1200-den astamy qamaýǵa alyndy, dep habarlaıdy DW.
Irandaǵy jappaı narazylyq kezinde qaza tapqan 35 adamnyń 29-y narazylyq bildirýshi, tórteýi bala, al ekeýi qaýipsizdik kúshteri qyzmetkeri. Irandaǵy adam quqyqtary belsendileri uıymy men onyń HRANA medıa jelisi 5 qańtarda usynǵan málimetterge sáıkes, jeltoqsan aıynyń sońynda bastalǵan Irandaǵy narazylyq kem degende 88 qalada nemese eldiń 31 provıntsııanyń 27-sinde ótti.
Adam quqyqtary belsendileriniń aıtýynsha, Iran qaýipsizdik kúshteri demonstranttarǵa qarsy kúsh qoldanǵan. Bul áreketter Meshhed pen Iran astanasy Tegerandy qosa alǵanda, iri qalalarda narazylyqtyń jańa tolqynyn týdyrdy. El boıynsha kem degende 17 ýnıversıtettiń stýdentteri narazylyq aktsııalaryna qosyldy.
BAQ-tyń habarlaýynsha, buǵan jaýap retinde qaýipsizdik kúshteri kampýstarǵa shabýyl jasaı bastady. Jalpy alǵanda, elde bastalǵan narazylyq Irandaǵy 2022 jyldan bergi eń iri narazylyqqa aınaldy. 22 jastaǵy Mahsa Amınıdiń «moraldyq polıtsııa» ustaǵannan keıin qaıtys bolýy qoǵamdyq rezonans týdyrdy.
5 qańtarda Iran Islam Respýblıkasynyń sot bıligi narazylyq kezinde tutqyndalǵandarǵa eshqandaı jeńildik kórsetilmeıtinin málimdedi.
Irandaǵy jappaı narazylyq 28 jeltoqsannan beri jalǵasyp keledi. Olar Tegerannyń basty bazarynda bastaldy. Onda kóptegen saýdager ınflıatsııa men baǵanyń kúrt aýytqýyna narazylyq retinde dúkenderin japty.
Dúnıejúzilik banktiń málimeti boıynsha, qazan aıynda eldegi azyq-túlik ınflıatsııasy 64,2%-ǵa jetti.
Buǵan deıin Irannyń Joǵarǵy kósemi Álı Hameneı Iranda tártipsizdikterdi qozdyrǵandardy «ornyna qoıý» qajet dep málimdegen bolatyn.
