05:00, 05 Naýryz 2026 | GMT +5
Irandaǵy úsh eldiń dıplomattary Ázerbaıjanǵa evakýatsııalandy
ASTANA. KAZINFORM — Irandaǵy Horvatııa, Ispanııa men Brazılııa elshilikteriniń jáne dıplomatııalyq ókildikterdiń qyzmetkerleri «Astara» memlekettik shekara beketi arqyly Ázerbaıjanǵa evakýatsııalandy. Bul týraly AZERTADJ jazdy.
Evakýatsııa protsesi tıisti protsedýralarǵa sáıkes júrgizilip, úsh eldiń elshiligindegi barlyǵy 30 adamnyń Ázerbaıjan Respýblıkasyna ótýine ruqsat etildi.
Tirkeý rásimderinen keıin evakýatsııalanǵandar belgilengen jerlerge aman-esen jetkizilgen.
Qazirgi tańda «Astara» memlekettik shekara beketinde evakýatsııalaý jumystary toqtaýsyz júrgizilip jatyr.
Aıta keteıik, Birikken Arab Ámirlikteri Tegerandaǵy elshiligin jaýyp, dıplomattaryn keri qaıtarady.