Irandaǵy soǵys Qazaqstannyń astyq eksportyna qalaı áser etip jatyr
ASTANA. KAZINFORM – Irandaǵy geosaıası jaǵdaı Qazaqstannyń syrtqy saýdasyna aıtarlyqtaı áser etpeıdi. Ulttyq ekonomıka mınıstrligindegiler Kazinform saýalyna bergen jaýapta osyndaı ustanym bildirgen.
Vedomstvonyń málimetinshe, 2025 jyly eki el arasyndaǵy taýar aınalymy 430,2 mln dollar bolǵan. Al bul Qazaqstannyń jalpy saýdasynyń 0,3%-y ǵana.
- Eksport – $239,3 mln, ımport – $191 mln. Qazaqstannyń Iranǵa eksporttaıtyn negizgi taýary – arpa men bıdaı (90%-dan astam). Bul kólemder basqa naryqtarǵa baǵyttalýy múmkin. Qazaqstan Irannan polımerli ónimder, keptirilgen jemis, irimshik, súzbe, maı sııaqty azyq-túlik ónimderin ımporttaıdy. Bul Iran baǵyty logıstıkalyq marshrýttar men júkterdi jetkizý bóliginde qazaqstandyq taýarlardy jetkizýdiń negizgi arnasy bolyp otyrǵan joq, - dep jazylǵan mınıstrlik málimetinde.
Jaýaptan Irandaǵy jaǵdaı ýshyǵa berse, Qazaqstan astyq eksportynyń balama baǵyttaryn izdeýge májbúr bolatynyn ańǵarýǵa bolady. Bul – eksport múmkindikteriniń shektelýinen belgi beretin jaıt.
Aıta keteıik, buǵan deıin elimiz bıyl 76 mln tonna munaı eksporttaýdy josparlap otyrǵany habarlandy.
Al astyq pen un eksporty 9,9 mln tonnaǵa jetti.
