Irandaǵy narazylyq aktsııalary kezinde qaza tapqandar sany 5 137 adamǵa jetti
ASTANA. KAZINFORM — Iranda ekonomıkalyq qıyndyqtarǵa baılanysty bastalǵan narazylyq aktsııalary saldarynan qaza tapqandar sany 5 137 adamǵa jetkeni belgili boldy. Bul týraly Anadoly habarlady.
AQSh-ta ornalasqan Adam quqyqtaryn qorǵaý belsendileri jańalyqtar agenttiginiń (Human Rights Activist News Agency — HRANA) habarlaýynsha, eldiń kóptegen óńirin qamtyǵan narazylyq sharalary barysynda 27 797 adam ustalǵan. Sonymen qatar 5 137 adam qaza tapqan, olardyń 208-i — qaýipsizdik kúshteriniń qyzmetkerleri.
Irandaǵy narazylyqtar
Irandaǵy narazylyq aktsııalary 28 jeltoqsanda ulttyq valıýtanyń kúrt qunsyzdanýy men ekonomıkalyq máseleler aıasynda Tegerannyń basty bazarynda bastaldy. Keıinnen bul aktsııalar eldiń kóptegen qalasyna tarady.
8 qańtar kúni Tegeranda narazylyqtar kezinde jaǵdaı ýshyǵa túskennen keıin Iran úkimeti ınternetke qoljetimdilikti shektedi.
Iran Shahıdter men ardagerler qory janyndaǵy Sot-medıtsınalyq basqarmanyń 23 qańtarda jasaǵan málimdemesine sáıkes, narazylyqtar barysynda qaýipsizdik kúshteriniń qyzmetkerleri men beıbit turǵyndardy qosa alǵanda, barlyǵy 3 117 adam qaza tapqan.
Naqtylanǵan derekterge sáıkes, olardyń 2 427-si «qarýly terrorıstik toptar» tarapynan qaza tapqan qaýipsizdik kúshteri men azamattyq tulǵalar ekeni aıtylǵan.
Irandaǵy narazylyqtar báseńdegenimen, shtab-páteri AQSh-tyń Vırdjınııa shtatynda ornalasqan HRANA qaza tapqandar men ustalǵandar jónindegi derekterdi jańartýdy jalǵastyryp, jańa jaǵdaılardyń rastalyp jatqanyn málimdep otyr.
Buǵan deıin Iran narazylyq kezinde shamamen 2000 adam qaza tapqanyn moıyndaǵan edi.
Jaqynda Tramp Iran baǵytyna amerıkalyq «armada» jiberiletinin málimdedi.