Irandaǵy qazaq dıasporasynyń jaǵdaıy turaqty – Iran elshisi
ASTANA. KAZINFORM – Iranda turatyn qazaq dıasporasy jergilikti qoǵamǵa tolyq ıntegratsııalanǵan jáne Qazaqstanǵa kóshý máselesin kótergen joq. Bul týraly Irannyń Qazaqstandaǵy Tótenshe jáne Ókiletti Elshisi Alı Akbar Djoýkar baspasóz máslıhatynda aıtty.
Onyń aıtýynsha, Irandaǵy qazaq dıasporasynyń ókilderi ózderin ıran qoǵamynyń bir bóligi retinde sanaıdy jáne el tarıhyndaǵy kúrdeli kezeńderdi basqa azamattarmen birge ótkergen.
– Iranda turatyn qazaq dıasporasy ıran qoǵamyna tolyq sińisip ketken jáne ózderin el azamattarynan bólek qarastyrmaıdy. Tipti qıyn kezeńderde, shamamen 40 jyl buryn Saddam Hýseın rejıminiń agressııasy kezinde de qazaq dıasporasy ırandyqtarmen birge bolyp, óz elin qorǵady. Sondyqtan osy ýaqytqa deıin ırandyqtardyń, onyń ishinde qazaq dıasporasynyń Qazaqstanǵa kóshý týraly ótinish jasaǵan jaǵdaılary bolǵan joq, - dedi ol.
Elshiniń sózinshe, azamattardyń ótinishteri negizinen turmystyq sıpatta bolyp keledi jáne eki el azamattarynyń ózara qatynastaryna baılanysty máselelerge qatysty.
– Kóbine kúndelikti máseleler boıynsha ǵana júginý jaǵdaılary bolady. Mysaly, Qazaqstan azamattary belgili bir sharýamen Iranǵa barǵysy keledi nemese Iran azamattary Qazaqstanǵa keledi. Bul qalypty jaǵdaı. Mundaıda Qazaqstan men Iran taraptary qajetti kómek kórsetedi, - dep túsindirdi Alı Akbar Djoýkar.
Aıta keteıik, qazaqtar 1930 jyldary asharshylyq kezinde Irannyń Gúlistan provıntsııasyna kóship bardy. Qazir qandastarymyz Gorgan, Gombat qalalarynda qazaq aýyldarynda toptasa ómir súrip jatyr.
