Irandaǵy festıvalde «Alǵa» fılmi eki birdeı marapat aldy

Iranda ótken 14-shi halyqaralyq sporttyq fılmder festıvalinde «Ekinshi plandaǵy úzdik er adam róli» júldesin Erik Joljaqsynov alsa, «Úzdik rejısser» nomınatsııasynda Ernar Nurǵalıev jeńimpaz dep tanyldy. Bul týraly QR Mádenıet jáne aqparat mınıstrliginiń baspasóz qyzmeti málim etti. 

Atalǵan halyqaralyq sporttyq fılmder festıvalinde «Alǵa» fılmi eki birdeı júlde aldy. 

«Alǵa» – ákeleriniń qazasynan soń qylmysqa bet burǵan aǵaıyndylar jaıly fılm. Alaıda olardyń aýylyna talantty jastardy irikteý úshin jeńil atletıkadan jattyqtyrýshy kelip, ómirlerine ózgeris ákeledi. Aǵaıyndylardyń biri marafondyq júgirýden álem chempıonymen básekege túsedi.

Fılm Mádenıet jáne aqparat mınıstrligi men Ulttyq kıno ortalyǵynyń qoldaýymen túsirildi. Fılmniń prodıýseri – Maksım Akbarov, rejısseri – Ernar Nurǵalıev.

Eske sala keteıik, buǵan deıin Astanada «Ustaz» fılminiń tanystyrylymy ótkenin jazǵan bolatynbyz.