Irandaǵy áýe soqqylarynan keıin Tegeranda «qara jańbyr» jaýyp, aýa lastandy
ASTANA. KAZINFORM — Iranǵa jasalǵan áýe soqqylarynan keıin Tegeran qalasynda buryn-sońdy bolmaǵan deńgeıde aýa lastanyp, «qara jańbyr» qubylysy baıqaldy. Bul týraly ǵalymdar málimdedi, dep habarlaıdy BBC.
28 aqpannan beri bastalǵan AQSh pen Izraıldiń shabýyldary barysynda Iran astanasynyń mańyndaǵy keminde tórt munaı nysanyna soqqy berilgenin BBC Verify rastady.
Qala turǵyndarynyń aıtýynsha, qoıý tútin kún kózin jaýyp, keıbir aýdandarda kúıik ıisi qatty sezilgen. Sarapshylar keıbir zııandy zattardyń aýaǵa taralý kólemi buryn-sońdy bolmaǵan deńgeıge jetýi múmkin ekenin eskertip otyr.
Dúnıejúzilik densaýlyq saqtaý uıymynyń basshysy qaqtyǵystyń adamdar densaýlyǵyna tıgizetin zardabyna alańdaýshylyq bildirdi.
— Munaı nysandarynyń zaqymdanýy azyq-túlik, sý jáne aýanyń lastanýyna ákelýi múmkin. Bul ásirese balalar, qart adamdar jáne burynnan aýrýy bar adamdar úshin aýyr saldarǵa soqtyrýy yqtımal, — dedi ol.
Dag Veır, Qaqtyǵys pen qorshaǵan ortany baqylaý ortalyǵynyń dırektory «Tegerandaǵy jaǵdaıdyń erekshesi - biz mundaı halyq tyǵyz ornalasqan aımaqta mundaı shabýyldardy buryn-sońdy kórmegen edik» dep atap ótti.
Eske salsaq Ekologııa jáne tabıǵı resýrstar mınıstri Erlan Nysanbaev Irannan Ortalyq Azııa elderine «qyshqyldy bulttar» jetýi múmkin degen aqparat shyndyqqa janaspaıtynyn aıtqan edi.
