Iranda jemqorlyq jasady degen aıypppen AQSh pen EO-nyń «qara tizimine» engen mıllıarder qamaýǵa alyndy
ASTANA. 31 jeltoqsan. QazAqparat - Iranda dúısenbi keshke Sorinet Group korporatsııasynyń basshysy, mıllıarder Babak Zandjanı tutqyndaldy.
Bıliktegiler ony qarjylaı aıla-amaldar jáne jemqorlyq jolymen memleketke zalal keltirdi dep aıyptap otyr. Seısenbi kúni ırandyq BAQ habarlaǵandaı, ony Tegerandaǵy «Evın» túrmesine qamaǵan.
Zandjanıdiń esimi batysta keńinen tanymal. AQSh pen Eýroodaq elderi ony Islam Respýblıkasynda ıadrolyq baǵdarlamaǵa baılanysty engizilgen sanktsııa rejımin beıtaraptandyrýǵa áreket etýshilerdiń «qara tizimine» qosqan, sonymen birge munaı satý jáne bank isi boıynsha kúdikke alynǵan.
«Press-TV» telearnasynyń habarlaýynsha, mıllıarderdi qamaýǵa alýdyń sebepteriniń biri - Zandjanıdiń munaı satýdan túsken qarjyny ysyrap qylýy.
