Iranda jappaı narazylyqtarǵa baılanysty ınternetke shekteý qoıyldy
ASTANA. KAZINFORM — Iran bıligi elde bastalǵan jappaı úkimetke qarsy narazylyqtarǵa jaýap retinde ınternetke qoljetimdilikti shektedi. Narazylyqtarǵa ekonomıkalyq daǵdarys pen joǵary ınflıatsııa sebep bolǵan, dep habarlaıdy DW.
IT salasyndaǵy Cloudflare kompanııasynyń derekterine sáıkes, senbi kúni ınternet-trafık shamamen úshten birine tómendegen, al jeksenbi kúni tańerteń taǵy 15 paıyzǵa azaıǵan.
Áleýmettik jeli qoldanýshylary jappaı isten shyǵýlar bolyp jatqanyn habarlady.
Iran bıligi buǵan deıin de ınternetti 2009, 2019 jáne 2022 jyldardaǵy narazylyqtar kezinde, sondaı-aq ótken jyldyń maýsymynda Izraılmen bolǵan 12 kúndik soǵys kezinde shektegen edi.
Sarapshylardyń aıtýynsha, mundaı shekteýlerdiń basty maqsaty — sherýlerdi uıymdastyrýdy qıyndatý jáne narazylyqtardan foto men vıdeolardyń taralýyna kedergi keltirý.
Osy ýaqytta quqyq qorǵaý uıymdarynyń málimetinshe, eldiń batysyndaǵy Malekshahı aýdanynda bolǵan sońǵy qaqtyǵystar kezinde keminde tórt adam qaza taýyp, ondaǵan adam jaralanǵan. Bul óńirde kúrd ultynan shyqqan ırandyqtar kóp turady.
Buǵan deıin ırandyq BAQ Islam revolıýtsııasy saqshylar korpýsynyń bir jaýyngeri men «Basıdj» paramılıtarlyq jasaqtarynyń bir múshesi qaza tapqanyn habarlaǵan.
Irandaǵy narazylyqtar bir aptadan astam ýaqyttan beri jalǵasyp keledi. Alǵashynda sherýler Tegeranda bastalyp, keıin basqa qalalardaǵy stýdentter qosylǵan.
Resmı derekterge sáıkes, qaqtyǵystar bastalǵaly beri keminde 12 adam qaza tapqan, onyń ishinde qaýipsizdik kúshteriniń qyzmetkerleri de bar.
Irannyń joǵarǵy rýhanı jetekshisi aıatolla Álı Hameneı narazylyq bildirýshilerdiń ekonomıkalyq talaptaryn «negizdi» dep moıyndaǵanymen, «búlikshilerdi ornyna qoıý qajet» ekenin málimdedi.
Budan buryn Tramp Iran bıligin beıbit narazylyq bildirýshilerge kúsh qoldanbaýǵa shaqyrdy. Iran beıbit narazylyq bildirýshilerge oq atyp, olardy óltiretin bolsa, onda Amerıka Qurama Shtattary olarǵa kómekke keledi dep eskertti.
Óz kezeginde Irannyń BUU-daǵy turaqty ókili Amır Saıd Iravanı BUU Bas hatshysy men Qaýipsizdik keńesiniń tóraǵasyna hat joldap, AQSh prezıdenti Donald Tramptyń Tegeranǵa jasaǵan «zańsyz qaterlerin» aıyptaýdy surady.