Iranda úsh kúndik aza tutý jarııalandy

ASTANA. KAZINFORM — Quqyq qorǵaýshylardyń málimetinshe, Irandaǵy úkimetke qarsy narazylyq aktsııalary barysynda qaza tapqandar sany 500 adamnan asty, dep habarlaıdy Sky News. Elde úsh kúndik aza tutý jarııalandy.

Iran prezıdenti Masýd Pezeshkıan aza tutý sharalaryna qosylatynyn málimdep, el azamattaryn 12 qańtar kúni ótetin ulttyq marshqa qatysýǵa shaqyrdy.

Qaza tapqandardyń qatarynda 490 narazylyq bildirýshi jáne Irannyń qaýipsizdik qurylymdarynyń 48 qyzmetkeri bar. Human Rights Activists News Agency (HRANA) derekterine sáıkes, elde shamamen 10 myń adam qamaýǵa alynǵan. Iran bıligi ázirge adam shyǵynyna qatysty resmı málimet jarııalaǵan joq.

Narazylyq aktsııalary Irannyń barlyq provıntsııalaryndaǵy 186 qala men eldi mekenge tarady. Zorlyq-zombylyqtyń kúsheıýi men adam shyǵynynyń artýyna baılanysty Iran úkimeti ulttyq qarsylyq barysynda qaza tapqandardy eske alý maqsatynda úsh kúndik aza tutý jarııalady.

Osy ýaqytta Irandaǵy jaǵdaıdyń ýshyǵýyna baılanysty halyqaralyq oıynshylardyń yqtımal aralasý sharalary da talqylanyp jatyr. AQSh Memlekettik hatshysy Marko Rýbıo men Izraıl premer-mınıstri Bınıamın Netanıahý narazylyqtarǵa jaýap retinde AQSh-tyń qandaı qadamdar jasaýy múmkin ekeni jóninde keńes ótkizdi.

Eske sala ketsek, AQSh-ta ornalasqan Adam quqyqtaryn qorǵaý belsendileriniń jańalyqtar agenttigi (HRANA) Irandaǵy narazylyq aktsııalary kezinde qaza tapqandar sany 544 adamǵa jetkenin habarlady.