Iranda týý kórsetkishi jyl saıyn tómendep barady

ASTANA. KAZINFORM — Iranda «Otbasy men jastardy qorǵaý týraly zańǵa» qaramastan, týý deńgeıi tómendep jatyr, dap jazdy Anadolý.

«Shark» gazetiniń Halyq sany jáne azamattyq ister basqarmasy men Irannyń statıstıka ortalyǵynyń derekterine súıene otyryp daıyndaǵan habarlamasyna sáıkes, 2021 jyly Iranda 1 mıllıon 114 myń týý tirkelse, ótken jyly bul kórsetkish 12 paıyzǵa tómendep, 979 myń 928-di quraǵan.

Al osy jyly týý sany aldyńǵy jylmen salystyrǵanda taǵy 7 paıyzǵa azaıyp, 911 myń bolady dep kútilip otyr.

Irannyń Halyq sany máseleleri jónindegi ulttyq basqarmasynyń bas hatshysy Merzıe Vahıd Destdjerdı «Shark» gazetine bergen suhbatynda týý kórsetkishiniń tómendeýine qatysty pikir bildirdi.

Ol eldegi jastardyń ómirde kezdesetin qıyndyqtar men sátsizdikterge baılanysty bala súıý máselesine saqtyqpen qaraıtynyn atap ótip, «Otbasy men jastardy qorǵaý týraly zańǵa» qaramastan, týý deńgeıiniń tómendeý úrdisi jalǵasyp jatqanyn, al ata-analar úshin bala dúnıege ákelý kúrdeli sheshimge aınalyp otyrǵanyn aıtty.

Irannyń ishki ister mınıstri Iskender Mýmını de Iran halqy 75 jyldan keıin 40 mıllıon adamnan tómendeýi múmkin ekenin málimdedi.

Aıta keteıik, týý kórsetkishin arttyrý maqsatynda qabyldanǵan «Otbasy men jastardy qorǵaý týraly zań» 2021 jylǵy 16 qazanda Iran parlamentinde maquldanyp, Konstıtýtsııany qorǵaý keńesi bekitkennen keıin 2021 jylǵy 15 qarashada kúshine engen.

Irannyń demografııalyq saıasaty

1990–2010 jyldar aralyǵynda Iran halqynyń ósý qarqynyn tómendetý maqsatynda baqylanatyn demografııalyq ósim saıasatyn júrgizdi.

Alaıda 2012 jyly Irannyń rýhanı kóshbasshysy Álı Hameneıdiń nusqaýymen bılik bul saıasattan bas tartyp, el halqynyń sanyn 150–200 mıllıon adamǵa deıin arttyrýǵa baǵyttalǵan sharalar qolǵa alyndy.

Eske sala ketsek, elimizdegi halyq sany 1897 jyldan beri qalaı ózgergenin jazdyq. 

Al Shveıtsarııada halyq sanyna shekteý qoıý týraly usynys qyzý talqylanyp jatyr.