Iranda kedeılik ýshyǵyp barady

ASTANA. KAZINFORM — Halyqaralyq sanktsııalar kúsheıgen saıyn Irandaǵy teńsizdik pen kedeılik ýshyǵyp barady. Bul týraly Donya-ye-Eghtesad gazetinde jarııalandy, dep habarlaıdy Report.

Basylym AQSh Qarjy mınıstrliginiń 18 jeltoqsandaǵy 29 munaı tankeri men olardy basqaratyn kompanııalarǵa sanktsııa engizý týraly sheshimin eske túsirdi. Bul qadam sanktsııalardan jaltaryp, munaı men munaı-hımııa ónimderin eksporttaý úshin qoldanylatyn Irannyń «kóleńkeli flotyn» nysanaǵa alady.

Qolǵa alynǵan sharalar Irannyń valıýtalyq kirisin kúrt tómendetip, ınflıatsııa, valıýtanyń qunsyzdanýy jáne satyp alý qabiletiniń tómendeýimen kúresip jatqan ekonomıkaǵa qysymdy kúsheıtedi.

— Irandaǵy baǵanyń ósýi — kedeıliktiń belgisi. Ashyq naryqtaǵy shetel valıýtasy men altyn baǵasynyń kúrt ósýi keń taralǵan kedeılikti baıqatady. Osynyń saldarynan týyndaıtyn ınflıatsııa aldaǵy aılarda ırandyqtarǵa qosymsha aýyrtpalyq túsiredi. Tek sońǵy bir jyldyń ishinde elde azyq-túliktiń ortasha baǵasy 66 paıyzdan astamǵa ósti, — delingen maqalada.

Sondaı-aq basylym BUU sanktsııalarynyń qaıta kúshine enýinen jáne Iran sheneýnikteriniń eldiń ıadrolyq baǵdarlamasyn jalǵastyrýdy talap etetin birneshe márte málimdemelerinen keıin ınflıatsııalyq qysymnyń kúsheıgenin atap ótti.

Buǵan deıin Iran sońǵy ondaǵan jyldaǵy eń aýyr sý daǵdarysymen kúresip jatqandyǵy týraly jazdyq.