Iranda taǵy eki joǵary laýazymdy áskerı jetekshi kóz jumdy

ASTANA. KAZINFORM – Iran bıligi senbige qaraǵan túni Izraıldiń soqqylarynyń saldarynan taǵy eki joǵary shendi generaldyń qaza tapqanyn habarlady, dep habarlaıdy Kazinform VVS-ge silteme jasap.

Memlekettik telearnanyń habarlaýynsha, qarýly kúshter Bas shtaby barlaý basqarmasy bastyǵynyń orynbasary general Ǵolamreza Mehrabı men jedel qolbasshylyq basshysynyń orynbasary general Mehdı Rabbanı ajal qushqan.  

Juma kúni Izraıldiń soqqylarynan birneshe joǵary laýazymdy áskerı qolbasshylar, sonyń ishinde Islam revolıýtsııasy Saqshylar korpýsynyń basshysy Hosseın Salamı qaza tapty. Soqqylardan áskerılerden basqa Irannyń ıadrolyq baǵdarlamasyna qatysy bar kem degende alty ıadrolyq ǵalym kóz jumdy. 

BBC-diń Taıaý Shyǵystaǵy tilshisi Sebastıan Asher Izraıldiń shabýyly «Izraıldiń ótken qarashada Lıvandaǵy Hezbollaǵa qarsy shabýylynda qoldanylǵan strategııanyń keıbirin qabyldaǵan sııaqty» dep sanaıdy. Bul – Iran basshylyǵynyń negizgi múshelerin qabiletsiz etýge baǵyttalǵan soqqylar. 

Osy rette Irannyń BUU-daǵy ókili Izraıldiń áýe shabýyldarynan 78 adamnyń qaza tapqanyn, Iranda 320-dan astam adamnyń jaralanǵanyn habarlady. 

Eske salaıyq, jumaǵa qaraǵan túni Izraıl Iran aýmaǵyna jappaı soqqy jasady. Bul shabýyldyń saldarynan Islam revolıýtsııasy saqshylar korpýsynyń (KSIR) birqatar joǵary laýazymdy komandıri men ıadrolyq fızıka salasyndaǵy ǵalymdar qaza tapty. Iran sondaı-aq Natanz qalasyndaǵy ıadrolyq nysannyń zaqymdanǵanyn rastady, biraq radıatsııanyń taralý faktisin joqqa shyǵardy.

Sondaı-aq Iran Izraılge zymyran atyp, elde áýe dabyly jarııalanǵanyn jazǵanbyz.

Keıinnen Irannyń zymyran shabýylynan 21 adam zardap shekkeni belgili boldy.

Buǵan deıin Qazaqstan Taıaý Shyǵys elderine áýe keńistigin japqany anyqtaldy.