Iranda stýdentter narazylyǵy qaıta jandandy
ASTANA. KAZINFORM – Iranda jańa oqý semestriniń alǵashqy kúninde stýdenttik narazylyqtar qaıta bastaldy. Bul týraly Financial Times basylymyna silteme jasap sheteldik BAQ habarlady.
Tegerandaǵy bedeldi Amırkabır tehnologııalyq ýnıversıteti men Sharıf tehnologııalyq ýnıversıtetiniń stýdentteri kampýs aýmaǵynda jınalyp, Irannyń rýhanı kósemi aıatolla Álı Hameneıǵa qarsy urandar aıtqan. Sharıf ýnıversıtetinde qarsy kózqarastaǵy stýdenttik toptar arasynda qaqtyǵys bolǵany habarlandy. Úkimetke qarsy shyqqan jastar bılikti qoldaıtyndarǵa «Shah jasasyn!» degen uranmen jaýap bergen. Bul uran 1979 jylǵy Islam revolıýtsııasy kezinde bılikten ketken sońǵy shahtyń uly Reza Pehlevıge qatysty aıtylǵan.
Ádette Iranda qaýipsizdik kúshterine ýnıversıtet aýmaǵyna kirýge tyıym salynǵanymen, joǵary oqý oryndary tarıhı turǵyda saıası belsendilik pen demokratııalyq qozǵalystardyń ortalyǵy sanalady.
Narazylyq aktsııalary Tegeran ýnıversıteti men Shahıd Beheshtı ýnıversıtetinde de ótken. Keıbir stýdentter qańtar aıyndaǵy sherýler kezinde ustalǵan kýrstastaryn bosatýdy talap etken.
17 aqpanda Iranda buryn kúshpen basylǵan antıúkimettik narazylyqtar kezinde qaza tapqandardy eske alý sharalary ótti. Birqatar qalada ótken jıyndar jańa qaqtyǵystarmen qatar júrdi. Abadan qalasynda turǵyndar gúlder men qaza tapqandardyń sýretterin ustap, «Hameneıǵa ólim!» jáne «Shah jasasyn!» degen urandar aıtqan. Áleýmettik jelilerde taraǵan beınematerıaldarda atys dybystarynan keıin adamdardyń bytyraı qashqany kórinedi.
Sol kúni Tegerandaǵy Imam Homeını meshitinde bılik tarapynan resmı eske alý rásimi uıymdastyryldy. Qatysýshylar Iran týyn kóterip, «Amerıkaǵa ólim!» jáne «Izraılge ólim!» degen urandar aıtqan. Sharaǵa vıtse-prezıdent Mohammad Reza Aref pen Islam revolıýtsııasy saqshylary korpýsynyń qolbasshysy Esmaıl Kaanı qatysqan. Kaanı «tártipsizdikterdi qoldaǵandar jaýapkershilikke tartylady» dep málimdegen.
Aıta keteıik, Pentagon usynǵan jobalardyń biri Irannyń joǵarǵy kóshbasshysyn joıýdy kózdeıdi.
Keshe Germanııa SІM azamattaryn Irannan shuǵyl ketýge shaqyrdy.