Iranda saýda ortalyǵyndaǵy órtten segiz adam qaza tapty
ASTANA. KAZINFORM – Irannyń Shahrııar qalasyndaǵy saýda ortalyǵynda bolǵan órt saldarynan keminde segiz adam kóz jumdy, dep habarlaıdy Iran memlekettik telearnasy.
Memlekettik telearnanyń málimetinshe, qala Tegeran mańynda ornalasqan. Taǵy 36 adam túrli deńgeıde jaraqat alǵan, olardyń birqatary aýrýhanaǵa jetkizilgen.
Órt sóndirilip, qutqarý qyzmetteri oqıǵa ornynda saldardy joıý jáne úıindilerdi arshý jumystaryn júrgizip jatyr. Mamandar ǵımarat ishinde adamdardyń qalyp qoımaǵanyn tekserip jatyr.
Aldyn ala málimetterge sáıkes, órttiń shyǵýyna elektr júıesindegi aqaý nemese qaýipsizdik talaptarynyń saqtalmaýy sebep bolýy múmkin. Alaıda naqty sebepter tergeý barysynda anyqtalady.
Shahrııar prokýratýrasy saýda ortalyǵynyń qurylysyna jaýapty kompanııa basshysyn qamaýǵa alý týraly sheshim shyǵardy. Tergeý organdary órt qaýipsizdigi normalarynyń saqtalýyn tekserip jatyr.
Sońǵy jyldary Iranda saýda oryndary men óndiristik nysandardaǵy órt oqıǵalary jıilegeni baıqalady. Sarapshylar muny qaýipsizdik talaptarynyń jetkilikti deńgeıde saqtalmaýymen baılanystyrady.
Eske sala ketsek, keshe Óskemendegi kásiporyndardyń birinde jarylys boldy.
Sonyń saldarynan eki adam qaza taýyp, beseýi zardap shekti.
Sondaı-aq Qytaıda feıerverk fabrıkasyndaǵy jarylystan 21 adam qaza taýyp, 61 adam zardap shekti.
