Iranda prezıdent saılaýynda Pezeshkıan jeńiske jetti

ASTANA. KAZINFORM — Burynǵy Densaýlyq saqtaý mınıstri reformator Masýd Pezeshkıan Iran prezıdentin saılaýda jeńiske jetti. Bul týraly Islam Respýblıkasy saılaý shtabynyń resmı ókili Mohsen Eslamıge silteme jasap TASS habarlady. 

Ol IRIB efırinde aıtqandaı, búkil 30,530 mln bıýlletendi esepteý nátıjesi boıynsha qazirgi Iran tarıhynda toǵyzynshy saılanǵan prezıdent Pezeshkıan 16,384 mln daýys jınady.

Bul — jalpy sannyń kem degende 53,6 paıyzy.

Iran basshysynyń respýblıkanyń ulttyq qaýipsizdik joǵary keńesindegi ókili konservator Saıd Djalılı 13,538 mln daýys jınady, sáıkesinshe — 44,3%.

Resmı málimetke sáıkes, saılaýshylardyń 49,8 paıyzy daýys bergen.

— Daýys berýdiń ekinshi týryna 30,530 mln saılaýshy qatysty, al Iranda 61 mıllıonǵa jýyq adamnyń daýys berýge qaqysy bar. Prezıdent saılaýynyń birinshi kezeńinde kelýshiler úlesi shamamen 40% qurady, bul — Islam Respýblıkasy tarıhyndaǵy eń tómengi kórsetkish, - dedi Eslamı. 

5 shildede Iranda kezekten tys prezıdent saılaýynyń ekinshi týry ótti, ol eldiń atqarýshy bıligi basshysynyń kenetten qaıtys bolýyna baılanysty belgilendi. 

Islam Respýblıkasynyń Prezıdenti Ebrahım Raısı 19 mamyrda Shyǵys Ázerbaıjan provıntsııasynda tikushaq apatynan kóz jumǵan edi.