Iranda otandyq «Talan» fılmi kórsetiledi
ASTANA. QazAqparat - QR Mádenıet jáne sport mınıstrligi tapsyrysy boıynsha túsirilgen «Talan» kórkem fılmi Irannyń Tegeran qalasynda ótetin 36-shi Halyqaralyq Fadjr kınofestıvaline qatysady. Bul jaıynda aqparatty «Qazaqfılm» kınostýdııasynyń baspasóz qyzmeti taratty, dep habarlaıdy QazAqparat.
Otandyq týyndy sáýirdiń 19-27-si aralyǵynda ótetin festıvaldiń «Shyǵys panoramasy» baǵdarlamasy boıynsha qatysady.
Belgili rejısser Bolat Qalymbetov túsirgen fılmde jıyrmasynshy ǵasyrdyń 30-40-shy jyldaryndaǵy el tarıhynda oryn alǵan oqıǵalar qarapaıym adamdardyń ómiri arqyly baıandalady. Fılmniń stsenarıi jazýshy Júsipbek Qorǵasbektiń «Qasqyr-adam» povesiniń jelisi boıynsha jazylǵan.
«Sáýir aıynyń ortasynda Tegeranǵa jol tartamyn, ıran kórermenderine «Talan» fılmin tanystyramyn. «Fadjr» syndy beldi kınofestıvalda kartınanyń álemdik premerasy ótetinine óte qýanyshtymyn», - dedi rejısser Bolat Qalymbetov.
Bıyl festıvaldiń «Shyǵys panoramasy» baıqaýyna 12 eldiń, atap aıtqanda Qytaı, Vetnam, Ázerbaıjan, Irak, Grýzııa, Úndistan, Palestına, Japonııa, Mońǵolııa, Kýveıt, Sırııa jáne Qazaqstannyń fılmderi qatysady.
«Fadjr» kınofestıvalinde «Qazaqfılm» kınostýdııasynyń qatysýymen túsirilgen taǵy da bir kınotýyndy - «Ákege qońyraý shalý» fılmi kórsetiledi. Atalǵan kartına festıvaldiń negizgi halyqaralyq konkýrsynda baq synaıdy. Aıta ketsek, rejısser Serik Aprymov «Fadjr» festıvaline osydan 27 jyl buryn qatysqan. 1991 jyly rejısser túsirgen «Sońǵy aıaldama» atty debıýttyq kartına «Fadjr» festıvaliniń negizgi baıqaýyna qatysyp, «Úzdik fılm» júldesin alǵan bolatyn.
Esterińizge sala ketsek, «Ákege qońyraý shalý» fılmi Qazaqstan kınosynshylar qaýymdastyǵy uıymdastyrǵan «Synshylar tańdaýy» kınojúldesinde eki birdeı júldege - «Úzdik rejısser» jáne «Ekinshi plandaǵy úzdik er adam róli» (akter Erbolat Ospanqulovqa tabystaldy) qol jetkizdi. Munan bólek, atalǵan týyndy Reseıdiń «Nıka» atty kınojúldesine úmitker bolǵan. Atalǵan týyndy 2018 jyly sáýirdiń 19-26 aralyǵynda Reseı astanasynda ótetin 40-shy Máskeý halyqaralyq kınofestıvalinde «Sheberler» baǵdarlamasynda kórsetiledi.
Fadjr halyqaralyq festıvali 1982 jyly Irannyń Mádenıet mınıstrligi jáne ıslam baǵyty uıymymen negizi qalanǵan. Festıval Qıyr Shyǵystaǵy eń aýqymdy ári tanymal kınofestıval esepteledi.
Byltyr 2017 jyly «Fadjr» kınofestıvaliniń «Úzdik azııalyq fılmi» nomınatsııasynda bas júldeni «Qazaqfılm» kınostýdııasy jaryqqa shyǵarǵan rejısser Sábıt Qurmanbekovtyń «Oralman» fılmi aldy. Bıylǵy «Fadjr» jeńimpazdary festıvaldiń jabylý saltanatynda, 2018 jyly 27 sáýirde jarııalanady.
«Talan» fılminde taǵdyrdyń jazýymen bar ómirin elden jasyryn ótkizgen adamnyń ortamen baılanysy aqyry tragedııamen aıaqtalady. Osyndaı talaıly taǵdyrlar arqyly azattyq ańsaǵan ata-babalarymyzdyń armany -táýelsizdiktiń qadir-qasıeti kórinedi. Talan - taǵdyrdyń sınonımi.
«Ákege qońyraý shalý» fılmi jas jigittiń bala kezinen bastap eseıgen shaǵyna deıingi 25 jyl ómirin qamtıdy. Kartınada balanyń áke-sheshesimen arasyndaǵy qıyn qatynastary, jetkinshektiń sezimderi men basyna túsken qıyndyqtary sýretteledi.
