Iranda oq-dári zaýytynda jarylys boldy: qaza tapqandar bar
ASTANA. KAZINFORM — Irannyń Isfahan provıntsııasyndaǵy oq-dári óndiretin zaýytta seısenbi kúni jarylys bolyp, eki adam qaza tapty, dep habarlaıdy Iran International.
Oqıǵa Isfahan provıntsııasyndaǵy Meımede ornalasqan Ava Nar Parsian Chemical Industries kompanııasynyń qoımasynda bolǵan.
Oqıǵa ornyna shuǵyl qyzmetter men órt sóndirýshiler jiberildi. Jarylystyń resmı sebebi ázirge jarııalanǵan joq.
Sońǵy tórt kún ishinde elde osyǵan uqsas birneshe jaǵdaı tirkeldi. Resmı málimetterge sáıkes, keminde 73 adam qaza tapty, onyń ishinde 70 adam senbi kúni Bender-Abbas qalasyndaǵy Radjaı portynda bolǵan joıqyn jarylystyń qurbany boldy.
Kompanııanyń resmı saıtynyń málimetinshe, Ava Nar Parsian feıerverkter men oq-dári óndirisimen aınalysady jáne Irannyń Ulttyq qaýipsizdik keńesiniń baqylaýynda.
Alaıda Iran International basylymynyń tergeýine súıensek, kompanııanyń Irannyń áskerı qurylymdarymen baılanysy bolýy múmkin.
Iran 28 sáýir, dúısenbi kúni Shahıd-Radjaı portyndaǵy jarylystan qaza tapqandarǵa baılanysty el boıynsha jalpyulttyq aza tutý jarııalady.
Aıta ketelik Iran porttaǵy jarylysqa zymyran otynynyń qatysyn joqqa shyǵarǵan edi.