Iranda Nobel syılyǵynyń laýreaty qamaýǵa alyndy
ASTANA. KAZINFORM — Iranda áıelder quqyǵy úshin jáne repressııaǵa qarsy kúresimen tanymal Nargız Mohammadı taǵy da ustaldy, dep habarlaıdy BILD.
Derekkózdiń málimetinshe, Nargız Mohammadı saıası tutqyndardy birneshe ret qorǵaǵan, jaqynda qaıtys bolǵan advokat jáne quqyq qorǵaýshy Hosrova Alıkordıdi eske alý sharasy kezinde qamaýǵa alyndy. Advokat Hosrova Alıkordı jumys ornynda júrek talmasynan kóz jumǵan. Biraq onyń ólimine qatysty suraq kóp.
Mohammadı osymen 14-shi ret temir tordyń ar jaǵynda otyr. 2016 jyly ol ólim jazasyna qarsy adam quqyqtary qozǵalysyn basqarǵany úshin 16 jylǵa bas bostandyǵynan aıyryldy. 2024 jyldyń jeltoqsanynda ol aıaǵyna operatsııadan keıin medıtsınalyq sebeptermen ýaqytsha bosatyldy, sodan keıin onyń jazasy birneshe ret uzartyldy.
Mohammadı úkimettiń qysymyna qaramastan narazylyqtarǵa qatysýyn jalǵastyrdy. Ol tipti buryn ózi ustalǵan Tegerandaǵy atyshýly Evın túrmesiniń aldynda sherý ótkizdi. Evın temirtory azaptaýmen, tutqyndy kamerada jalǵyz jáne myńdaǵan saıası tutqyndardy negizsiz ustaýmen tanymal.
Amnesty International uıymynyń málimetinshe, Mohammadı qamaýda azaptalyp, birneshe ret ınfarkt bolǵan.
Eske sala keteıik, 31 jylǵa sottalyp ketken Nargız Mohammadı 2023 jyly beıbitshilik salasyndaǵy Nobel syılyǵyn aldy. Ol áıelder quqyǵyn qorǵaý jáne ólim jazasyn alyp tastaýdy jaqtaýshylardyń biri.