Iranda Naýryz meıramynda keńseler 9 kúnge jabylady - Myrzataı Joldasbekov

NUR-SULTAN. QazAqparat - Iranda Naýryz meıramynda eldegi keńse ataýly 9 kúnge jabylyp, bári bala-shaǵasyn alyp, týǵan jerine ketedi. Bul týraly Ortalyq kommýnıkatsııalar qyzmetinde ótken «Naýryz meıramyn merekeleýdiń jańa tásilderi» taqyrybyndaǵy brıfıngte aıtyldy, dep habarlaıdy QazAqparat tilshisi.

«Men Iranda elshi bolǵanmyn. Sol kezde Naýryz meıramy kezinde eldegi keńse ataýly 9 kúnge jabylyp, eshbir adam shetelge shyqpaı, bári bala-shaǵasyn alyp, týǵan jerine ketetin. Atqonysyna baryp, týǵan-týystarymen kórisetin», - deıdi Memleket jáne qoǵam qaıratkeri Myrzataı Joldasbekov.

Onyń aıtýynsha, Naýryz meıramyn merekeleý týraly jańa tujyrymdama kóńilinen shyqqan.

«19 naýryz «Zııatkerlik kúni» dep belgilenipti. Maqal-mátel, jumbaq, jańyltpash, jyrlar men epostardan úzindiler oqý jyl boıy jalǵasyn tabýy kerek dep oılaımyn. Qazirgi ýaqytta ulttyq taǵamdar umytyla bastady, onyń osy tujyrymdamaǵa kirgeni meni qýantyp otyr», - deıdi ol.