Iranda narazylyq kezinde polıtseılerdi óltirgen eki adam darǵa asyldy
ASTANA. KAZINFORM — Jyl basyndaǵy jappaı narazylyqtarǵa baılanysty sot isteri áli de jalǵasyp jatyr.
2026 jylǵy 8 qańtarda Irannyń Isfahan qalasynda ótken narazylyq kezinde tórt polıtsııa qyzmetkerin óltirgeni úshin sottalǵan eki adam 3 qarasha kúni ólim jazasyna kesildi. Bul týraly Irannyń Fars agenttigi málimdedi.
Iran sot bıliginiń baspasóz qyzmetiniń málimetinshe, oqıǵa Shahıd Alıhanı alańynda bolǵan. Onda qarýlanǵan búlikshiler toby quqyq qorǵaý organdarynyń qyzmetkerlerine shabýyl jasaǵan.
Tergeý materıaldaryna sáıkes, shabýyl jasaǵan Ámir Hoseın Málekı men Ámir Hoseın Ebrahımı atys jáne sýyq qarý, sondaı-aq janǵysh qospalar qoldanǵan. Oqıǵa kezinde qarýsyz tórt polıtsııa qyzmetkeri qaza tapty. Sondaı-aq ǵımarattar men polıtsııa bólimshesin qosa alǵanda, qoǵamdyq jáne jeke nysandar búlindi.
Tergeý barysynda quqyq qorǵaý organdary shabýylǵa qatysy bar kúdiktilerdiń kim ekenin anyqtap, birneshe adamdy ustady. Іs boıynsha beınebaqylaý kameralarynyń jazbalary, kýálar men aıyptalýshylardyń jaýaptary jáne basqa da materıaldar zerdelendi.
Irannyń sot bıliginiń málimetinshe, Málekı men Ebrahımı shabýylǵa tikeleı qatysyp, oqıǵa ornynda qarýmen júrgen. Polıtsııanyń habarlaýynsha, Ebrahımıdi ustaǵan kezde odan pyshaq, balta jáne basqa da sýyq qarý túrleri tabylǵan.
Sot ekeýin de ulttyq qaýipsizdikke qarsy qylmys jasaǵany úshin, sonyń ishinde jappaı tártipsizdikke jáne polıtsııa qyzmetkerleriniń qaza tabýyna ákep soqqan qarýly áreketteri úshin kináli dep tanydy.
Apellıatsııalyq shaǵymdardy qaraǵannan keıin Irannyń Joǵarǵy soty shyǵarylǵan úkimderdi ózgerissiz qaldyrdy. 3 qarasha kúni tańerteń sottalǵan eki adam darǵa asyldy.
Eske sala keteıik, buǵan deıin 2026 jylǵy qańtarda Irannyń birneshe qalasynda jappaı úkimetke qarsy narazylyqtar ótip, sherýshiler men qaýipsizdik kúshteri arasynda qaqtyǵys bolǵanyn jazǵan edik.
