Iranda munaı óńdeý zaýyty órtenip jatyr
NUR-SULTAN. QazAqparat – Irandaǵy munaı óńdeý zaýytyndaǵy órt jaǵdaıy tolyq baqylaýda, eldegi munaı óńdeý salasynyń ónimderin shyǵarýda irkilis bolǵan joq. Bul týraly QazAqparat IRNA agenttigine silteme jasap habarlaıdy.
Tegerandaǵy munaı óńdeý zaýytynda bolǵan iri órt sársenbi keshinde bastalǵan. Tilsiz jaýdy aýyzdyqtaýǵa órt sóndirý komandalary jiberildi. Oqıǵa ornyna kelgen Iran munaı mınıstri Bıjan Zangane órttiń MÓZ-diń eki rezervýarynan munaıdyń kemýi saldarynan shyqqanyn málim etti. Ol rezervýarlardyń óndiristik protseste úlken ról oınamaǵanyn aıtty.
Iran mınıstri jaǵdaıdyń qaýip týdyrtyp jatpaǵanyn aıtyp, «árıne, rezervýarlarda kóptegen aýyr kómirsýtekter bar, olardan kóp tútin shyǵady, biraq tútinniń kóp shyǵýy mańyzdy birdene bolǵanyn bildirmeıdi» dep qosty. Zangane MÓZ óndirisin erteńnen bastap qalpyna keltirýi múmkin ekenin aıtty.
Tegeran munaı óńdeý zaýyty – eldegi eń iri MÓZ biri bolyp tabylady, ol Irannyń munaı óńdeý qýattylyqtarynyń shamamen 15 paıyzyn qamtamasyz etýde. Zaýyt benzın, dızel otynyn, gazoıl, mazýt jáne basqa ónimderdi óndiredi. Ol Tegeran provıntsııasynyń ońtústik bóliginde ornalasqan.
