Iranda koronavırýstan eki adam ajal qushty
TEGERAN. IRNA-QazAqparat — Iranda koronavırýs juqtyrǵan eki adam qaıtys boldy. Bul týraly IIR Densaýlyq saqtaý mınıstriniń keńesshisi Kıanýsh Djahanpýr málim etti, dep habarlaıdy QazAqparat IRNA-ǵa silteme jasap.
«Ókinishke qaraı, koronavırýs anyqtalǵan egde jastaǵy eki adam jan tapsyrdy» dep habarlady Djahanpýr.
Buǵan deıin Irannyń Densaýlyq saqtaý mınıstri eki adamnyń koronavırýs juqtyrǵanyn rastaǵan bolatyn.
Bul aqparatty ırandyq úkimet ókili Alıı Rabıı de rastady.
«Birneshe mınýt buryn Densaýlyq saqtaý mınıstri mekeme mamandarynyń baıandamasyna súıene otyryp, Kýmda koronavırýs juqtyrdy degen kúdigi bar eki adamnyń saraptamasy oń nátıje kórsetkenin málim etti», - dep jazdy ol Twitter paraqshasynda.
Bul Irandaǵy alǵashqy koronavırýs juqtyrý oqıǵalary.
Eki adam qaza tapqan Kýmda beısenbi kúni mektepterdegi sabaq toqtatyldy.
19 aqpan kúngi sońǵy málimetter boıynsha Qytaıda jańa koronavırýstan qaıtys bolǵandar sany eki myń adamnan asty.
