Iranda Izraıl shabýylynan 220-dan astam adam qaza tapty
ASTANA. KAZINFORM - Izraıldiń Iran aýmaǵyna jasaǵan soqqysynan 224 adam qaza taýyp, 1200-den astam adam jaralandy. Bul týraly Islam Respýblıkasy Densaýlyq saqtaý mınıstrliginiń resmı ókili Hoseın Kermanpýr málimdedi, dep habarlaıdy TASS agenttigi.
– Izraıldiń 65 saǵattyq agressııasynan keıin qaza tapqandar men jaralanǵandar sany 1481-ge jetti, onyń 1 277-si eldegi ýnıversıtet klınıkalaryna jatqyzyldy. <…> Qazir 224 adam qaıtys boldy, - dep jazdy vedomstvo ókili X jelisindegi paraqshasynda.
Ol zardap shekkenderdiń 90 paıyzdan astamy beıbit turǵyndar, sonyń ishinde áıelder men balalar ekenin atap ótti.
Eske salaıyq, 13 maýsymǵa qaraǵan túni Izraıl Iran aýmaǵyna jappaı soqqy jasaǵan. Oǵan jaýap retinde Tegeran júzden astam drondy Izraıl baǵytyna ushyrdy. Iran Natanzdaǵy ıadrolyq nysannyń zaqymdanǵanyn rastady, alaıda radıatsııanyń taralýyn joqqa shyǵardy.
BUU-daǵy Iran ókili Izraıldiń áýe soqqylary saldarynan 78 adamnyń qaza tapqanyn, taǵy 320-dan astam adamnyń jaraqat alǵanyn málimdedi. Qaza bolǵandar qatarynda Irannyń joǵary áskerı basshylyǵy men jetekshi ǵalymdar bar.
Sondaı-aq Izraıldiń shabýylynan keıin Iran Ormýz buǵazyn jabý múmkindigin qarastyryp jatqanyn Iran parlamentiniń ulttyq qaýipsizdik jáne syrtqy saıasat jónindegi komıtet múshesi Esmaıl Kosarı habarlady.
Iran men AQSh arasyndaǵy kelissózderge araǵaıyndyq jasap júrgen Oman Syrtqy ister mınıstri Badr ál-Býsaıdı Maskatta jeksenbi kúni ótýi tıis kezdesýdiń ótpeıtinin rastady.
Iran Prezıdenti Emmanýel Makronmen sóılesý kezinde Izraıl shabýyldaryn toqtatpaıynsha AQSh-pen eshqandaı kelissóz júrgizilmeıtinin málimdedi.
Axios málimetinshe, Izraıl AQSh-ty Iranmen soǵysýǵa shaqyrady.
Izraıl soqqycynan Islam revolıýtsııasy Qamqorshylar korpýsynyń barlaý basshysy men orynbasary qaza tapty.
Eýrokomıssııa prezıdenti Izraıl premer-mınıstrimen telefon arqyly sóılesti.