Iranda hıdjap kımegenderdiń jazasyn kúsheıtetin zań maquldandy
Kelesi kezeńde jańa zań Konstıtýtsııa kúzeti keńesi – konservatıvtik dinbasylardan turatyn baqylaý organyna tanystyrylady.
CNN telearnasynyń habarlaýynsha, zań jobasy hıdjap kııýden bas tartqan áıelderge asa iri aıyppul salatyn nemese uzaq merzimge túrmege qamaıtyn, zańdy buzǵan tanymal adamdar men kompanııalarǵa jazany qatańdatyp, dress-kodty buzǵandardy jasandy ıntellekt arqyly anyqtaıtyn 70 baptan turady.
Qazir Iran zańnamasynda dress-kod buzǵandar 10 kúnnen eki aıǵa deıin qamaýǵa alynady nemese 50 myńnan 500 myń ıran rıalyna (1-den 10 eýroǵa deıin) deıin aıyppul tóleıdi.
Al jańa zań paketi boıynsha bes jyldan on jylǵa deıin qamaýǵa alynyp, 360 mln ıran rıalyna (7800 eýro) deıin aıyppul tóleýi múmkin.
Zańdy qatańdatý – el bıliginiń 2022 jylǵy narazylyq sharalaryna jaýaby. Oǵan hıdjapty durys taqpaǵany úshin ustalyp, qamaýda qaza tapqan 22 jastaǵy Mahsa Amınıdiń ólimi sebep boldy.
El bıligi narazylyqty qatygezdikpen toqtatyp, birneshe adamdy ólim jazasyna kesti.
Nemistiń dpa agenttiginiń aıtýynsha, narazylyq toqtaǵanyna qaramastan kóptegen áıel hıdjap taǵý týraly talapqa qarsylyq tanytady.
Oǵan jaýap retinde bılik ókilderi birneshe aıdan beri burynǵydan da qatań sharalardy daıyndap jatyr.
